ԵՐԵՎԱՆ, 20 սեպտեմբերի — Sputnik. Ռեժիսոր Մհեր Մկրտչյանի «Կյանք և կռիվ» ֆիլմը պատմում է ընկերների մասին, որոնց ճակատագիրը մերթ միացնում է, մերթ բաժանում: Արդյունքում նրանք հանդիպում են մարտի դաշտում, 90-ականների սկզբին՝ ղարաբաղյան պատերազմի ժամանակ:
«Շուրջ մեկ տարի առաջ կաստինգ է հայտարարվել, որից հետո մենք ձեռնամուխ ենք եղել նկարահանումներին: Այն ամենը, ինչ նկարահանվել է ֆիլմում, նույնիսկ անվանումը, պատահական չի ընտրվել, այլ մանրամասն ընտրության արդյունքում»,- Sputnik Արմենիայի թղթակցի հետ զրույցում ասաց Մկրտչյանը:
Ֆիլմի գլխավոր հերոսը դերասան Սամվել Թադևոսյանն է, նա եկել էր ֆիլմի պրեմիերային զինվորական հագուստով: Այժմ նա ծառայում է Երևանի զորամասերից մեկում:
«Ֆիլմը պատմում է այն սերնդի մասին, որն ապրել է ԽՍՀՄ փլուզումը, որի հետ միասին կործանվել են երազանքները, պատրանքները, սերը, և սկսվեց պատերազմը»,- ասաց Թադևոսյանը:
Նրա խոսքով, ֆիլմն արտացոլում է 90-ականների իրականությունը, երբ ոմանք լքում էին երկիրը, մյուսները մեկնել էին ռազմի դաշտ, շատերն էլ մնացել էին իրենց ընտանիքի հետ:
«Իմ հերոսն առանձնապես չի ազդել ինձ վրա, քանի որ նկարահանումների ընթացքում ես գիտակցեցի, որ ընդամենը դեր է, բայց այն ինձ մի քիչ այլ կերպ տրամադրեց»,- խոստովանեց Թադևոսյանը:
Ֆիլմի պրեմիերային նախագահի հետ ներկա էին նաև Հայաստանի կառավարության որոշ անդամներ: Ֆիլմը կիոնթատրոններում կցուցադրվի սեպտեմբերի 21-ից:
