ԵՐԵՎԱՆ, 20 սեպտեմբերի — Sputnik. Հովիկ Աբրահամյանի կառավարությունը հայտարարում էր իր գրանցած հաջողությունների ու 10%-անոց տնտեսական աճի մասին, նոր կառավարության ղեկավարը նշանակումից անմիջապես հետո ԱԺ-ի ամբիոնից հայտարարեց, որ ՀՀ տնտեսությունը ծայրահեղ ծանր վիճակում է:
Փոխվարչապետ Վաչե Գաբրիելյանի մեկնաբանմամբ` նորանշանակ վարչապետի այս հայտարարությունը վերաբերել է ոչ թե տնտեսական աճին, այլ տնտեսական կառավարման մոդելին: Դա նշանակում էր, որ զարգացման նախկին ռեսուրսները սպառված են և հետագա աճի ապահովման համար անհրաժեշտ են նոր ռեսուրսներ ու մոտեցումներ:
«Խոսքը չի վերաբերում նրան, որ տնտեսական աճ չի եղել, որ թվերն իրական չեն: Խոսքը վերաբերում է տնտեսական զարգացման այն մոդելին, որն առկա էր և հարկ է նոր մոտեցում, որը կշարադրվի վարչապետի կողմից շուտով»- ասաց Վաչե Գաբրիելյանը:
Թե ինչ քայլեր կձեռնարկի կառավարությունը, Վաչե Գաբրիելյանը չցանկացավ ասել՝ խորհուրդ տալով սպասել կառավարության գործունեության նոր ծրագրի ներկայացմանը:
«Վարչապետի մոտ քննարկումներ են իրականացվում, և օրենքով կա սահմանված ժամանակ՝ թե՛ կառավարություն կազմելու, թե՛ դրանից հետո 20 օրվա ընթացքում արդեն ծրագիր ներկայացնելու ԱԺ: Ժամանակի ընթացքում, թե՛ կառավարության կազմը ամբողջովին պարզ կլինի, թե՛ նոր կառավարության ներկայացրած մոտեցումները, և պարտադիր չէ, որ դրանք լինեն ժխտողական անցյալում արձանագրված փաստերի հետ: Խոսքը վերաբերում է զարգացման հեռանկարին ու մոտեցումներին, և ոչ թե նախկին մոտեցումների սխալ կամ ճիշտ լինելուն, այլ դրանց սպառված լինելուն»,- ասաց փոխվարչապետը:
Նախկին կառավարության` մինչև տարեվերջ տնտեսական 7% աճ ապահովելու խոստումը նոր կառավարության անունից փոխվարչապետը խոստացավ իրականացնել, բայց 2.5-3.5%-ի սահմաններում:
