ԵՐԵՎԱՆ, 19 սեպտեմբերի — Sputnik. Կարեն Կարապետյանի նշանակմամբ մամուլում լուրեր շրջանառվեցին, որ կառավարության կազմը 90 տոկոսով փոփոխվելու է։ Ամենից շատ շահարկվում են ՀՀ ֆինանսների, տրանսպորտի և կապի, առողջապահության և մշակույթի նախարարների պաշտոնակատարների անունները։ Արդյո՞ք մշակույթի նախարարի պաշտոնակատար Հասմիկ Պողոսյանը լսել է իր պաշտոնանկության մասին և ինչպես՞ է վերաբերվում այդ լուրերին։ Sputnik Արմենիայի հարցին Պողոսյանը պատասխանեց.
«Ես շատ հաճելի կզարմանայի, եթե դուք այսօր ինձ այդ հարցը չտայիք, բայց, ցավոք սրտի, ոչ ոք բացառություն չէ։ Եվ ես պատասխանեմ` ինձ մշակույթի ոլորտից հարցեր տվեք, կպատասխանեմ, տվեք այն հարցերը, որոնց պատասխաններն իմն են, այն պատասխանները, որոնք իմը չեն, այդ հարցերը մի տվեք ինձ, եղա՞վ»,-ասաց նախարարի պաշտոնակատարն ու շտապեց հեռանալ։
Ի դեպ, ըստ մամուլում շրջանառվող լուրերի` կառավարության առաջիկա նիստում հայտնի կդառնա, թե որ նախարարները կվերանշանակվեն, իսկ որոնք հրաժեշտ կտան իրենց պաշտոնին։
