ԵՐԵՎԱՆ, 18 սեպտեմբերի — Sputnik. Արագածոտնի, Արարատի, Արմավիրի, Սյունիքի և Տավուշի մարզերի 317 համայնքներում 2016 թվականի սեպտեմբերի 18-¬ին նշանակված են տեղական ինքնակառավարման մարմինների հերթական ընտրություններ:
Կենտրոնական ընտրական հանձնաժողովի տվյալներով, 22 համայնքում տեղի է ունենում միայն համայնքի ղեկավարի ընտրություն, 80 համայնքում` միայն ավագանու անդամի, իսկ 215 համայնքում միաժամանակ անցկացվելու է համայնքի ղեկավարի և ավագանու անդամի ընտրություններ:
Ազգային ժողովում խմբակցություն ունեցող կուսակցությունները և կուսակցությունների դաշինքը սահմանված կարգով ԿԸՀ են ներկայացրել իրենց հայտերը:
Հայաստանի Հանրապետական, «Բարգավաճ Հայաստան», «Հայ Յեղափոխական Դաշնակցություն» և «Օրինաց երկիր» կուսակցությունների կողմից նշանակումներ են կատարվել բոլոր 541 տեղական ընտրական հանձնաժողովներում:
«Հայ ազգային կոնգրեսը» նշանակումներ չի կատարել 36 ՏԸՀ-ում, իսկ «Ժառանգություն» կուսակցությունը՝ մեկ տեղամասային ընտրական հանձնաժողովում:
Այսօր մինչև կեսգիշեր պարզ կլինի ՏԻՄ ընտրությունների նախնական արդյունքը։ Նախընտրական պայքարը որոշ քաղաքներում ընթացել է խիստ լարված մթնոլորտում, տեղի են ունեցել միջադեպեր, որոնց հիման վրա հարուցված են քրեական գործեր։
Հուսանք, որ ընտրական օրը կանցնի առանց կրակոցների ու ծեծկռտուքի, և մեր երկրի քաղաքացիները չեն մոռանա, որ ընտրություններն անցողիկ են, իսկ նույն գյուղի կամ քաղաքի բնակիչները միմյանց երեսի նայելու են ամեն օր…
