ԵՐԵՎԱՆ, 18 սեպտեմբերի — Sputnik, Արմենուհի Մխոյան. Ռուսաստանի Դաշնության չափահաս քաղաքացիները, որոնք մշտապես բնակվում են Հայաստանի տարածքում, ինչպես նաև ռուսաստանցի զբոսաշրջիկները, սեպտեմբերի 18-ին մասնակցում են ՌԴ Պետդումայի ընտրություններին նաև Գյումրիում տեղակայված ՌԴ հյուպատոսարանի տարածքում գործող թիվ 8031 ընտրատեղամասում՝ ներկայացնելով գործող օտարերկրյա անձնագիրը։ Այստեղ են քվեարկում ինչպես Շիրակում, այնպես էլ Լոռիում բնակվողները:
Քվեարկությունը կանցկացվի մինչև ժամը 20-ը: Եւս 3 տեղամաս Շիրակի մազի տարածքում գործում է 102-րդ ռազմաբազայի տարածքում:
Հյուպատոսարանում ընտրությունը սկսվել է ժամանակին և նորմալ ընթանում է: Այդ մասին վստահեցրեց թիվ 8031 ընտրատեղամասի նախագահ, Գյումրիում ՌԴ հյուպատոս Եվգենի Կոնիշևը:
«Ընտրողների հոսք օրվա ընթացքում սպասվում է: Ընթացքն արդեն ակտիվ է, բայց ավելին ենք սպասում: Դա կապված է նրա հետ, որ այսօր հանգստյան օր է, սակայն, ինչպես ցույց է տալիս փորձը, Հայաստանում Ռուսաստանի քաղաքացիները բավական ակտիվ են, և մեծ հոսք կլինի մի քանի ժամից, երբ իրենց քաղաքացիական պարտքը կատարելու համար Գյումրի կգան նաև հարևան Լոռու մարզից: Սպասում ենք նաև ՌԴ քաղաքացիների՝ Վրաստանում բնակվող: Այնպես որ, հյուպատոսարանում տեղակայված տեղամասում սպասում են մեծ ակտիվության»,-նշեց հյուպատոսը:
Հյուպատոսն իր քաղաքացիական պարտքը կատարեց Sputnik Armenia-ներկայությամբ, որից հետո, կարևորելով ընտրական գործընթացը, ՌԴ յուրաքանչյուր քաղաքացու համար նշեց.
«Պետդումայի պատգամավորների ընտրությունն անչափ կարևոր է, մենք պետք է կարողանանք ընտրել արժանի, գրագետ ու արհեստավարժ պատգամավորների, որոնք կկարողանան օրենքներ ընդունել՝ ի շահ ՌԴ քաղաքացիների»,-նշեց պատասխանատուն:
«Ընտրատեղամասը բացվել է ընտրողի համար առավոտյան ժամը 8-ին, սակայն մինչ այդ մեր կողմից կատարվել են նախապատրաստական վերջին աշխատանքները՝ ստուգել քվեախցերը, կնիքների առկայությունը և այլն: Կաշխատենք մինչև ժամը 20-ը, որից հետո արդեն կսկսենք հաշվարկը»,-հավելեց թիվ 8031 ընտրատեղամասի նախագահ, Գյումրիում ՌԴ հյուպատոս Եվգենի Կոնիշևը:
