ԵՐԵՎԱՆ, 17 սեպտեմբերի — Sputnik. Դեռևս մի քանի ամիս առաջ Sputnik Արմենիան տեղեկացրել էր, որ կառավարությունը որոշել է զոհված զինծառայողների և ազատամարտիկների ընտանիքների համար ստեղծել սոցիալական պաշտպանության երաշխիքներ, տալ կրթական, առողջապահական արտոնություններ:
Այդ առումով կրթական ոլորտում արդեն առաջընթաց կա։ Կրթության և գիտության նախարար Լևոն Մկրտչյանը հայտարարել է, որ ապրիլյան պատերազմին մասնակցած ուսանողների ուսման վճարը կզեղչվի։
Խոսքը վերաբերում է այն սովորողներներին, որոնց զինգրքույկում առկա է պատերազմին մասնակցելու մասին համապատասխան գրառում:
Նախարարի որոշումն արդեն ուժի մեջ է, բուհերին 50 տոկոս և ավելի զեղչ կիրառելու մասին շրջաբերական է իջեցվել:
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
