ԵՐԵՎԱՆ, 15 սեպտեմբերի – Sputnik. Ազգային ժողովը 105 «կողմ», 4 «դեմ» ձայնով ՀՌԱՀ անդամ նշանակեց Տիգրան Հակոբյանին: Ինչպես հայտնեց ԱԺ ժամանակավոր հաշվիչ հանձնաժողովի նախագահ Սուքիաս Ավետիսյանը, փակ գաղտնի քվեարկությանը մասնակցել է 111 պատգամավոր: Քվեատուփում առկա 111 քվեաթերթիկներից 2-ը համարվել է անվավեր:
Շնորհակալություն հայտնելով պատգամավորներին իրեն ընտրելու համար Տիգրան Հակոբյանն անկեղծորեն խոստովանեց, որ նման արդյունք չէր սպասում:
«Շնորհակալություն, ես գնացի աշխատելու»,- ասաց Տիգրան Հակոբյանն ու հեռացավ:
Տիգրան Հակոբյանը եղել է «Ռեսբուպլիկա Արմենիա», «Հայք» թերթերի գլխավոր խմբագիրը, զբաղեցրել է ՀՀ Հեռուստառադիոպետկոմի նախագահի և ՙԱրմենպրես՚ լրատվական գործակալության գլխավոր տնօրենի պաշտոնները, եղել է ՀՀ կառավարության աշխատակազմի տեղեկատվության և հանրության հետ կապերի վարչության և կառավարությանը առընթեր տեղեկատվության եւ գրահրատարակչության վարչության պետը:
Տիգրան Հակոբյանն այժմ «ՄԿՌ մեդիա Արմենիա» մեդիա հոլդինգի տնօրենն է: Հոլդինգի կազմում են «21tv» հեռուստաընկերությունը, «Արձագանք FM» ռադիոկայանը, «Դոմինանտ Փրոդաքշն» արտադրական ընկերությունը, «Մեդիա Ֆոկուս» գովազդային գործակալությունը:
