ԵՐԵՎԱՆ, 15 սեպտեմբերի — Sputnik. Երևանի «ՄԻԿԱ» մարզադաշտում սեպտեմբերի 17-19-ը կինոլոգիական մի շարք միջոցառումներ կանցկացվեն, այդ թվում ռազմամարզական մրցումներ և բոլոր շնատեսակների միջազգային ցուցահանդես, Sputnik Արմենիայի թղթակցին է հայտնել Հայաստանի կինոլոգիական միության նախագահ Վիոլետ Գաբրիելյանը։
«Միջոցառմանը կմասնակցեն երկրի բոլոր ուժային կառույցները. ԱԻՆ, ՆԳՆ, ՊՆ, մաքսային ծառայության շները։ Կլինեն նաև հյուրեր այլ երկրներից։ Ծրագիրը շատ հետաքրքիր է։ Շները պետք է փնտրեն թմրանյութեր, ինչպես նաև պայթուցիկ սարքեր», — նշել է Գաբրիելյանը։
Նրա խոսքով, միջոցառման ընթացքում կիրականացվի գրոհ ահաբեկչի վրա։ Գաբրիելյանն ասաց, սեպտեմբերի 18-ին կայանալիք ցուցահանդեսը գնահատելու են աշխարհի տարբեր երկրներից ժամանած անվանի փորձագետներ։
«Այս տարի մեզ մոտ առաջին անգամ կժամանեն մասնագետներ Շվեդիայից և Իսպանիայից։ Մեզ այցելել են Անգլիայից, Իրլանդիայից, Ֆինլանդիայից», — ընդգծել է նա։
Գաբրիելյանն ասել է, որ մարզադաշտը, որտեղ անցկացվելու է ցուցահանդեսը, լավ կահավորված է և գտնվում է իդեալական վիճակում։
Կինոլոգիական միջոցառմանը մասնակցել ցանկացողների համար մուտքն ազատ է։ Հայկական գելխեղդը կամ գամփռը Հայաստանի շների ազգային տեսակն է։
Այն շատ հին է, որը բնական ճանապարհով ձևավորվել է Հայկական լեռնաշխարհում, հնուց պաշտպանել է ոչխարների հոտը գիշատիչների՝ գայլերի, արջերի, ընձառյուծների հարձակումներից։ Ֆիզիկական և հոգեբանական տվյալներից ելնելով, գամփռը կռվում ամենավտանգավոր շունն է և լավագույն գելխեղդն աշխարհում։ Գամփռը գենետիկական հիվանդություններ չունի և համարվում է բացարձակ առողջ աշխատանքային շուն։
