ԵՐԵՎԱՆ, 15 սեպտեմբերի — Sputnik. ՀՀԿ գերագույն մարմնի հերթական նիստից հետո լրագրողների հետ հանդիպել է Ազգային Ժողովի փոխնախագահ, Հանրապետական կուսակցության խոսնակ Էդուարդ Շարմազանովը։
Նա նշել է, որ նիստի ընթացքում քննարկել են օրակարգային հարցեր, որոնցում էական մասը կառավարության աշխատակազմին է վերաբերել։ Էդուարդ Շարմազանովը հայտնել է, որ առաջիկայում կառավարության կազմը կփոխվի։
Թե ովքեր են լինելու նոր կառավարության պաշտոնյաները՝ առայժմ պարզ չէ։ Շարմազանովը չի հրապարակել անուններ, ասելով, որ դեռևս քննարկումներ են ընթանում, ուստի կոռեկտ չէ կոնկրետ անձանց մատնացույց անելը։
Լրագրողներին հետաքրքել է, թե Հովիկ Աբրահամյանի կադրերը լինելո՞ւ են գործադիրի նոր կազմում։
«Ուզում եմ տեղեկացնել, որ չկան Տիգրան Սարգսյանի, Հովիկ Աբրահամյանի և այլոց կադրեր, կա Հանրապետական կուսակցության միասնական թիմ։ Թե՛ Տիգրան Սարգսյանի, թե՛ Հովիկ Աբրահամյանի, թե՛ Կարեն Կարապետյանի կառավարությունը, մենք բոլորս մեկ քաղաքական թիմ ենք, որն ունի մեկ առաջնորդ՝ Սերժ Սարգսյան»,- պատասխանել է Շարմազանովը:
Շարմազանովը նշել է, որ ինչպես Տիգրան Սարգսյանի և Հովիկ Աբրահամյանի կառավարության ամբողջական պատասխանատուն եղել է ՀՀԿ-ն, այդպես էլ Կարեն Կարապետյանի կաբինետի պատասխանատուն է:
Նա չի բացառել, որ կառավարության նոր կազմում կարող են լինել նաև այլ կուսակցություններ, քանի որ, ինչպես հայտարարել է Կարեն Կարապետյանը, իրենց քաղաքական թիմի համար դոգմա չէ կուսակցական պատկանելությունը, կարևորը ՀՀԿ ծրագրին համահունչ նպատակներ ունենալն է:
