ԵՐԵՎԱՆ, 15 սեպտեմբերի – Sputnik. «Խոսքը գյուղապետերի թեկնածուների կողմից հնչող սպառնալիքներն են՝ ուղղված ընտրողներին, ինչպես նաև նրանց խուլիգանական գործողությունները»,- գրում է թերթը՝ անդրադառնալով Շիրակի մարզի Սարատակ գյուղում տեղի ունեցած դեպքին, երբ գյուղապետի թեկնածու ՀՀԿ-ական Միշա Ղրզոյանի որդին ծեծի էր ենթարկել համագյուղացի կնոջը՝ Սվետլանա Վարդանյանին:
Մինչ այս դեպքով հարուցված քրեական գործի նախաքննությունը շարունակվում է, թերթը բացահայտում է գյուղապետի տարիներ շարունակ թույլ տված կեղծիքները:
«Միշա Ղրզոյանը տարիներ շարունակ, կեղծելով ընտրացուցակները, կեղծել է նաև ընտրողների հասցեները՝ արհեստականորեն ավելացնելով գյուղի նպաստառու ընտանիքների թիվը: Ինչպես գյուղապետն ինքն է ամեն քայլափոխի հպարտանում՝ կորած մարդ չէ, ու լիքը թև-թիկունք ունի ու վայելում է Արթիկի ոստիկանապետի հովանավորությունը,- գրում է թերթը՝ հավելելով.- Ստացվում է գյուղը «կազմաքանդելու» գործում նրան աջակցել են Արթիկի ոստիկանապետն ու անձնագրային ու վիզաների վարչության Արթիկի ծառայության պետը։ Ըստ գյուղի նպաստառուների ցուցակի` գյուղում որևէ նորմալ ընտանիք չկա, նույնիսկ երիտասարդ ամուսինները, ըստ փաստաթղթերի, ամուսնալուծված են»:
Թերթի եզրահանգմամբ, պետությունը, որ տարիներ շարունակ հպարտորեն աշխարհին է ներկայացնում հայկական ընտանիքի մոդելը, այսօր «զբաղված է այդ մոդելի փաստաթղթային խեղումներով»:
