Հեծանիվ հերթական անգամ չի հայտնագործվելու, ու, ինչպես սովորաբար, սպասում ենք տոնական շքերթի, ինչ-որ համերգի և մայրաքաղաքի ու հիմնական քաղաքների ինչ-որ հրապարակներում, այգիներում զանազան միջոցառումների` մի քիչ մեծերի, մի քիչ փոքրերի համար:
Դե, ցուցահանդեսներ էլ կարող են լինել, օրինակ` Ազգային արխիվում, Պետական պատկերասրահում, էլի ինչ-որ վայրերում: Այս մասին գրելու առիթն էլ չէր լինի, եթե ստանդարտ միջոցառումների նկատմամբ դրանք իրագործող գերատեսչությունների ստանդարտից դուրս վարքը չլիներ:
Արդեն գրեթե մեկ շաբաթ է` փորձում ենք Հայաստանի պաշտպանության, մշակույթի նախարարություններից ու Երևանի քաղաքապետարանից պարզել, թե հատկապես որն ինչ միջոցառում է իրականացնում Անկախության 25-ամյակի կապակցությամբ:
Երբ Պաշտպանության նախարարությունից գոնե ասվում է, որ ռազմական շքերթն են անելու,բայց դրա մասին փակագծեր չեն բացելու մինչև ինչ-որ ամսաթիվ, էլի հասկանում ես: Գուցե ռազմական գաղտնիքի խնդիր այստեղ էլ կա: Բայց երբ մեկ շաբաթ շարունակ խոսքը կտուրն են գցում Մշակույթի նախարարությունից ու քաղաքապետարանից, ոչ մի բացատրություն չկա:
Մնում են ենթադրություններն այն մասին, որ նշյալ գերատեսչությունները կա՛մ գումարը ստացել, բայց դեռ չգիտեն, թե ինչը որտեղ է ծախսվել ու, ի վերջո, ինչ են ցույց տալու տոնական օրը, կա՛մ կառավարությունում նոր վարչապետի նշանակմամբ սպասվող փոփոխություններն այստեղ էլ արդեն ունեցել են իրենց ազդեցությունը:
Մի անկյուն գտած, շառից —փորձանքից հեռու, մամուլի քարտուղարները, փոխնախարարներն ու նախարարների ժամանակավոր պաշտոնակատարները սպասում են իրենց գլխի գալիքին:
Պարզապես այս դեպքում էլ քաղաքապետարանի լռությունն է առնվազն տարօրինակ դառնում: Շատ էլ, Կարեն Կարապետյանը Երևանի նախկին քաղաքապետն է եղել, մի ավել բառի համար,վարչապետական գործերը թողած, հո ձեզնո՞վ էլ չի զբաղվելու:
Հ.Գ. Նկատենք,որ այստեղից-այնտեղից, միջոցառումների մասին լուրեր, իհարկե, հնարավոր է գտնել ու հրապարակել: Բայց ինչու՞ է լռում պաշտոնական լրատվությունը:
