««Աքիլլես» ավտովարորդների իրավունքների պաշտպանության կենտրոն» հկ-ի նախագահ Էդուարդ Հովհաննիսյանը Sputnik Արմենիայի եթերում խոսում է փոփոխություններին հաջորդած 13 օրվա և Ճանապարհային ոստիկանության կոռուպցիոն ռիսկերի մասին։
«Այս ընթացքում մեր կազմակերպությունը գործողություները հաստատված համաձայնագրով որևէ բողոք չի ստացել»,- ասում է Հովհաննիսյանը` նշելով, որ դեռ քիչ ժամանակ է անցել ասելու համար, որ հարցը լուծվել է։
Սակայն նա խոսում է մեկ այլ բողոքի մասին, որը վերաբերում է Ճանապարհային ոստիկանությանը։
«Այսօր եթե վարորդները համաձայնության են գալիս, ապա որևէ վարույթ չի հարուցվում, և վարորդն այլևս չի տուգանվում 30 հազար դրամով։ Վարորդները, որպես կանոն, գալիս են համաձայնության, բայց տեսուչներն ասում են` չէ, եթե դուք փոխհամաձայնության եկել եք, բայց միևնույն է մենք ձեզ կտուգանենք 30 հազարի չափով, կգտնենք մեղավորին և կտուգանենք։ Դա խախտում է։ Կոռուպցիայի ռիսկն ակնհայտ է, որովհետև Ճանապարհային ոստիկանության կողմից խախտվում է օրենքը, իսկ խախտելը հավասարազոր է կոռուպցիային»,- ասում է Հովհաննիսյանը և ևս մեկ անգամ հիշեցնում` եթե վարորդները փոխհամաձայնության են եկել, եթե անգամ նրանցից մեկն էլ մեղավորության բաժինը վերցրել է իր վրա, ապա վերջնական եզրակացությունը տալիս է ԱՊՊԱ գործակալությունը, այնպես որ նման դեպքերում, պետք է հստակ իմանալ, որ իրենք չեն տուգանվում։
