ԵՐԵՎԱՆ, 14 սեպտեմբերի — Sputnik. Հայաստանն այսօր ընդունեց Ռուսաստանից ժամանած հատուկ հյուրերին` անվանի դերասաններին և ռեժիսորներին։ Նրանք «Ռուսական կինոյի շաբաթ» միջոցառման հյուրերն էին։
Սեպտեմբերի 14-ից 18-ը Ռուսական մշակույթի օրվա շրջանակում Երևանում, Գյումրիում և Աբովյանում Ռուսական կինոյի շաբաթ կանցկացվի։
Հայերն ու ռուսները կինոյում
Նախագծի հյուրերից մեկը` Ռուսաստանի Դաշնության մշակույթի նախարարության կինեմատոգրաֆի բաժնի տնօրենի տեղակալ Գալինա Ստրոչկովան, կարծում է, որ հայ և ռուս ժողովուրդներն իրար կապող շատ օղակներ ունեն:
«Ավագ սերունդը մեծացել է այն ֆիլմերով, որոնցում նկարահանվել են հիանալի հայ դերասանները, և մինչև հիմա այդ ֆիլմերը համարվում են մեր կինեմատոգրաֆի դասական գործերը»,- ասաց նա։
![Заместитель Директора Департамента кинематографии Министерства культуры Российской Федерации Галина Строчкова Заместитель Директора Департамента кинематографии Министерства культуры Российской Федерации Галина Строчкова - Sputnik Արմենիա](https://cdn.am.sputniknews.ru/img/488/34/4883439_0:0:1600:1065_600x0_80_0_0_67733e444f0a5d00a3d352c8e5a47081.jpg)
Ստրոչկովան ուրախալի համարեց այն փաստը, որ «Ռուսական կինոյի շաբաթը» դարձել է ավանդական միջոցառում, և հայտնեց, որ այս տարի Ռուսական կինոյի տարին անցկացվում է ողջ աշխարհում:
«Այսօր մենք բերել ենք ժամանակակից ֆիլմեր, որոնք արտացոլում են ժամանակակից ռուսական կինոյի բազմազանությունը: Այս տարվա ամենաեկամտաբեր ֆիլմը «Էկիպաժն» է»,- ասաց գերատեսչության ներկայացուցիչը:
Ռուսական կինոն Հայաստանի հաճախակի հյուրն է
Հայաստանում ռուսական կինեմատոգրաֆը չափազանց պահանջված է և մեծ ուշադրություն է վայելում, կարծում է Երևանում Գիտության և մշակույթի ռուսական կենտրոնի տնօրեն Մարկ Կալինինը:
![Директор Российского центра науки и культуры в Ереване Марк Калинин Директор Российского центра науки и культуры в Ереване Марк Калинин - Sputnik Արմենիա](https://cdn.am.sputniknews.ru/img/488/36/4883681_0:0:1600:1065_600x0_80_0_0_64acbe320192187a26326e53ae970daa.jpg)
«Դրա հաստատումը Հայաստանում անցկացվող շատ կինոփառատոներում ներառված ռուսական կինոյի ծրագիրն է: Օրինակ՝ «Ոսկե ծիրան», «Կին» փառատոները, «Ռեանիմացիա»» անիմացիոն ֆիլմերի միջազգային փառատոնը և այլն: Ուրախալի է, որ այդ փառատոներում պահանջարկ ունի նաև ռուսական կինոն. հայ հանդիսատեսը նրբորեն զգում և հասկանում է արվեստը»,- ասաց Կալինինը:
Նրա խոսքով՝ ռուսական կինոյի օրերն անցնում են շատ կազմակերպված և պրոֆեսիոնալ մակարդակում:
Նա Գիտության և մշակույթի ռուսական կենտրոնի և Հայաստանում Ռուսաստանի դեսպանատան անունից ողջունեց ռուսական կինոյի բոլոր սիրահարներին:
Հայաստանի մշակույթի նախարարի տեղակալ Ներսես Տեր-Վարդանյանն էլ նշեց, որ դա շատ կարևոր ծրագիր է, քանի որ իրագործվում է «Հաայստանում Ռուսական մշակույթի օրեր» նախագծի շրջանակում:
![Заместитель Министра культуры Республики Армения Нерсес Тер-Варданян Заместитель Министра культуры Республики Армения Нерсес Тер-Варданян - Sputnik Արմենիա](https://cdn.am.sputniknews.ru/img/488/33/4883377_0:0:1600:1065_600x0_80_0_0_ce4fb74fa793553272832e9e1a0a7c76.jpg)
«Դա հայ-ռուսական համագործակցության մի մասն է: Վերջին տարիներին ռուսական կինոարտադրությունը զարգանում է արագ տեմպերով: Ֆիլմերի ցուցադրություն կլինի Երևան, Գյումրի և Աբովյան քաղաքներում: Կարծում եմ, որ այս շաբաթվա ընթացքում պետք է ժամանակ գտնել և հարստացնել կյանքը ռուսական կինոարվեստով»,- ասաց նա:
«Շարմ Հոլդինգի» տնօրեն Կարեն Ղազարյանն ու «Հայաստանում Ռուսական կինոյի շաբաթի» պրոդյուսեր Ալլա Ռազուվաևան ողջունեցին բոլորին և շնորհակալություն հայտնեցին երկու երկրի մշակույթի նախարարություններին աջակցության համար:
Միջոցառումն անցկացվում է ՀՀ մշակույթի նախարարության, ՌԴ մշակույթի նախարարության, Հայաստանում ՌԴ դեսպանատան աջակցությամբ: Նախագծի իրագործման գործում դերակատարություն են ունեցել նաև Երևանում Գիտության և մշակույթի ռուսական կենտրոնը, Երևանի թատրոնի և կինոյի ինստիտուտը:
Կինոցուցադրությունների հիմնական հարթակները կդառնան «Մոսկվա» կինոթատրոնը Երևանում, Գիտության և մշակույթի ռուսական կենտրոնը, Գյումրու «Հոկտեմբեր» կինոթատրոնը, Աբովյանի Ռուս և հայ ժողովուրդների բարեկամության թանգարանը:
Միջոցառման գլխավոր նպատակը երկու երկրների և ժողովուրդների մերձեցումն է, ռուսական մշակույթով, մասնավորապես կինոարվեստով հետաքրքրվող մարդկանց միավորումը, փորձի և ավանդույթների փոխանակումը: Ֆիլմերը կներկայացնեն դրանց ստեղծողները, դիտումներից հետո քննարկումներ կանցկացվեն հանդիսատեսի հետ:
Ռուս կինեմատոգրաֆիստները հայ հանրությանը կներկայացնեն տարբեր ժանրերի ֆիլմեր. «Մարտ Սևաստապոլի համար» և «Գումարտակ» ռազմական դրամաները, «Սիրո մասին» ֆիլմը, «Համադասարանցիները», «Նախաճած հայրիկի մոտ» կատակերգությունները, «Մաքուր արվեստ» դետեկտիվը, «Ուրվականը» ընտանեկան ֆիլմը, «Գայլերը և ոչխարները. խելագար կերպարափոխություն» անիմացիոն ֆիլմը, «Դուխլես», «Դուխլես 2», «Խաղադրույք սիրո վրա», «Անձնակազմ» ֆիլմերը, ինչպես նաև «Երկրաշարժ» ֆիլմի փակ ցուցադրությունը:
Ծրագրի պաշտոնական հյուրերի թվում են ՌԴ մշակույթի նախարարության կինեմատոգրաֆի բաժնի տնօրենի տեղակալ Գալինա Ստրոչկովան, հայտնի կինեմատոգրաֆիստներ՝ Նիկիտա Միխալկովի «ՏրիՏէ» ստուդիայի պրոդյուսեր Լեոնիդ Վերեշչագինը, «Մոսֆիլմ» կինոկոնցեռնի գլխավոր տնօրեն Կարեն Շահնազարովը, «Նոր մարդիկ» ընկերության պրոդյուսեր Նատալյա Մոկրիցկայան, «Խաղադրույք սիրո վրա» ֆիլմի ռեժիսոր Արտյոմ Միխալկովը, «Նախաճաշ հայրիկի մոտ» ֆիլմի պրոդյուսեր Գեորգի Շաբանովը, պրոդյուսեր, կաստինգ տնօրեն Գորդանա Միլևիչը, ինչպես նաև դերասաններ Կատերինա Շպիցան, Միլոշ Բիկովիչը:
Ցուցադրությունների մուտքն ազատ է: