ԵՐԵՎԱՆ, 13 սեպտեմբերի — Sputnik, Գոհար Սարգսյան. Անվանի հոգեբան Ռոբերտ Էփսթայնն ապացուցել է, որ «Goօgle» որոնողական համակարգը զբաղվում է ուղեղների «լվացմամբ» և աջակցում է Քլինթոնին նախընտրական քարոզարշավում։ Հիլարի Քլինթոնի մասին տեղեկություն որոնելիս` «Goօgle»-ն անմիջապես հուշում է այնպիսի տարբերակներ, որոնք ԱՄՆ նախագահի կին թեկնածուին դրական քողի տակ են ներկայացնում։ PR մասնագետ Հայկ Կիրակոսյանը հիշեցնում է` պատերազմները վաղուց են տեղափոխվել տեղեկատվական տիրույթ։
«Այսօր ամբողջ տեղեկատվության հոսքը Հիլարի Քլինթոնի մասին է, ինչքան էլ Դոնալդ Թրամփը (ԱՄՆ-ի նախագահի թեկնածու Հանրապետական կուսակցությունից) կոտորվեց փողեր ծախսելով։ Իսկ ամենաթանկ պրոդուկտն ուշադրությունն է։ Հիլարի Քլինթոնի` ԱՄՆ նախագահ ընտրվելու հավանականությունը չափից ավելի մեծ է, որքան էլ ցավալի չլինի մրցակցի` Թրամփի համար։ Որոշակի ինտուիտիվ ու տրամաբանական եզրահանգումներով պետք է բոլորիս համար պարզ լինի` եթե նախորդ նախագահը սևամորթ է, հաջորդը պետք է լինի կին, կնոջից հետո չի բացառվում, որ համասեռամոլ լինի»,- ասաց PR մասնագետը։
Սրանով Միացյալ նահանգներն ուզում է ցույց տալ իր մտքի ազատությունն ու նորաձևություն թելադրել նախագահի ընտրություններում նաև իր սահմաններից դուրս։
Այնուամենայնիվ, բարձրացած աղմուկից հետո, ըստ կանխատեսումների, հնարավոր է` «Goօgle»-ը հանդես գա սոցիալական նախագծով, նույնիսկ Թրամփին աջակցող քայլեր անի։ Մյուս կողմից էլ, Կիրակոսյանի վստահեցմամբ, նշյալ որոնողական համակարգը մեծ համբավ ունի ամբողջ աշխարհում, և մի բլոգերի կամ հոգեբանի «հայտնագործությունը» դրա անվան վրա բացասական ազդեցություն չի ունենա։
«Մարդիկ շարունակելու են հավատալ Goօgle»-ին,- հավաստիացրեց նա։
PR մասնագետը չբացառեց, որ այս սկանդալային պատմության հետևում կանգնած լինի Հիլարի Քլինթոնի շտաբը` ներկայացնելով կին թեկնածուին որպես մեկը, որին դավաճանել է ամուսինը, նա ցանկանում է հայտնվել իշխանության բարձունքին, իսկ նրան խոչընդոտում են։
«Այս դեպքում չեզոք ընտրազանգվածի մոտ առաջանում են որոշակի բնազդներ, խղճում են, ջենտլմենական զգացումներ ունենում։ Պաշտպանական բնազդն է առաջ գալիս»,-ասաց մասնագետը։
Այս ամենից պետք է նախ դաս քաղի հայ հասարակությունը, որը վստահում է սոցիալական ցանցերին ու որոնողական համակարգերին։ Կիրակոսյանը նշում է, որ մեզանից յուրաքանչյուրի մասին համաշխարհային սարդոստայնն ավելի մեծ տեղեկություն ունի, քան մեր ընտանիքները։ Ինտերնետը ստվերային ուղղորդողի դեր է խաղում։
Քանի որ ինքը` «Goօgle»-ը, զբաղվում է հասարակությանն ինֆորմացնելով, ինքն էլ որոշում է ճաշից հետո դեսերտը կլինի, թե հակառակը։
