ԵՐԵՎԱՆ, 12 սեպտեմբերի — Sputnik. ՀՀ ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանը կարծում է, որ մեզ համար շահեկան է Հայաստանի ներկայացուցչի նշանակումը ՀԱՊԿ գլխավոր քարտուղարի պաշտոնում։ Նա միաժամանակ ընդգծեց, որ ՀԱՊԿ-ն ունի հիմնադիր փաստաթղթերում ամրագրված կանոնադրական խնդիրներ, որոնցից դուրս գալ չի կարող։
«Չպետք է չափազանցնել ու մտածել, որ միայն այդ փաստով կարող ենք մեզ համար ամենաշահավետ լուծումներ ակնկալել բոլոր հարցերում»,- ասաց Նահապետյանը։
Նահապետյանը կարդացել է մամուլի այն հրապարակումները, թե ՀԱՊԿ գլխավոր քարտուղարի պաշտոնը ստանձնելու է Սեյրան Օհանյանը։ Նա հորդորեց հավատալ միայն պաշտոնական հաղորդագրություններին և ձեռնպահ մնաց մեկնաբանություններից։
«Դեռ նման նշանակում չի եղել, երբ կլինի նշանակում և թափուր կմնա ՊՆ պաշտոնը, այդ ժամանակ կանդրադառնանք այդ հարցին»,- իր խոսքը եզրափակեց Կորյուն Նահապետյանը։
