Վազգեն Մանուկյան
ՀՀ առաջին վարչապետ Վազգեն Մանուկյանը պատրաստ է արձագանքել ՀՀ վարչապետի պաշտոնում առաջադրված Կարեն Կարապետյանի հայտարարությանն ու որոշ խորհուրդներ տալ ինչպես տնտեսական, այնպես էլ իշխանական համակարգում աշխատելու բնագավառում:
Նա արդեն նույնիսկ հստակ պատկերացնում է, թե ինչ խորհուրդ է տալու նորանշանակ վարչապետին:
«Առաջինը՝ ամեն ինչ ապահովել, որ Հայաստանում լինի արդար, ազատ մրցակցություն և ոչ թե իշխանություն կամ զոռբայություն ունեցողները կարողանան բիզնեսով զբաղվել, և երկրորդը՝ կան արդյունաբերության ճյուղեր, որոնց գործարկման դեպքում հույսը մասնավորի վրա դնելը սխալ է, պետությունը պետք է որոշ ճյուղեր վերցնի իր օժանդակության ներքո»,- ասել է Վազգեն Մանուկյանը:
Արմեն Աշոտյան
ՀՀԿ փոխնախագահ Արմեն Աշոտյանը, խոսելով Հովիկ Աբրահամյանի հրաժարականի և այդ պաշտոնում Կարեն Կարապետյանի թեկնածության մասին, ասել է, որ վերջինի ընտրության ժամանակ հաշվի է առնվել նրա փորձառությունն ու գործունեությունը էներգետիկ, տնտեսական համակարգում, ինչպես նաև քաղաքապետի պաշտոնում դրսևորած կառավարչական հմտությունները:
«Քաղաքական փոփոխությունները ոչ միայն հրամայական են, այլև հանրային ակնկալիք և պահանջ»,- ասել է Աշոտյանը:
Երվանդ Բոզոյան
Քաղաքագետ Երվանդ Բոզոյանի կարծիքով՝ Հայաստանում վարչապետները քավության նոխազի դեր են կատարում: Քաղաքագետի խոսքով՝ Հայաստանում վարչապետի փոփոխությունը պայմանավորված չէ նրա աշխատանքի արդյունավետությամբ, այլապես նախորդ վարչապետ Տիգրան սարգսյանի պաշտոնավարման ընթաքում րանցված տնտեսական անկման և դրամի արժեզրկման պարագայում դեռ 2009 թ-ին պետք է Հայաստանը նոր վարչապետ ունենար:
«Հովիկ Աբրահամյանի վարչապետության տարիները չեն հիշվում ո՛չ դրական, ոչ բացասական իմաստով: Նրա պաշտոնավարման ընթացքում դրական տեղաշարժ չէր կարող լինել, որովհետև նրա առջև սահմանափակումներ էին դրվել հենց պաշտոնը ստանձնելու պահին, երբ ասվել էր, որ նախորդ վարչապետի ժամանակ ամեն ինչ լավ է եղել: Իսկ երբ ընդունում ես այդ սահմանափակումները, չես կարող լուրջ հաջողության հասնել: Հովիկ Աբրահամյանի ժամանակահատվածը ես կորցրած շրջան եմ համարում»,- ասել է Բոզոյանը:
Մանվել Բադալյան
ՀՀ քաղաքացիական ծառայության խորհրդի նախագահ Մանվել Բադալյանի խոսքով՝ քաղաքական գործընթացները փոփոխություններ են ենթադրում։ Քաղաքական պաշտոնյաները, նրա խոսքով, պետք է գան ու գնան, դա նորմալ ընթացք է։
«Սոցիալ-տնտեսական այնպիսի իրավիճակ է մեր հասարակության մոտ, որ դժգոհությունները հասկանալի են: Մի կախարդական փայտիկով այդ ամենը լուծել հնարավոր չէ: Ապագա կառավարությունը լուրջ անելիքներ ունի»,- ասել է նա։
Վարդան Բոստանջյան
Տնտեսագետ Վարդան Բոստանջյանի կարծիքով՝ միայն Հովիկ Աբրահամյանի հրաժարականը քիչ է:
«Միայն նման բարձրաստիճան պաշտոնյայի փոփոխությամբ չափազանց դժվար կլինի խնդիրների լուծման հասնել։ Պետք է թիմ լինի, որը բաղկացած կլինի հզոր մարդկանցով և, բացի այդ, նրանք աշխատելու հնարավորություն կունենան»,- ասաց Բոստանջյանը` նշելով, որ Հովիկ Աբրահամյանի ղեկավարած կառավարությունն էլ էր մտահոգված երկրի խնդիրներով, սակայն դրսևորվելու մեծ հնարավորություններ չուներ»,- ասել է Բոստանջյանը։
Մարգարիտ Եսայան
Ազգային ժողովի ՀՀԿ խմբակցության պատգամավոր Մարգարիտ Եսայանի խոսքով՝ կառավարությունները հրաժարականներ տալու սովորություն ունեն, և բնական է, որ Հովիկ Աբրահամյանի կառավարությունը, ելնելով իրավիճակից, հրաժարական տվեց։
«Ոչ մեկի համար գաղտնիք չէ, որ մեր երկրին փոփոխություններ են պետք, մենք պետք է գնանք դրանց, չենք խուսափում դրանցից, որպեսզի հասարակությունը գոհ լինի և տնտեսական ու սոցիալական վիճակը բարելավվի»,- ասել է Եսայանը:
Ռուբեն Բաբայան
Երևանի Տիկնիկային թատրոնի տնօրեն Ռուբեն Բաբայանը հուսով է, որ նոր վարչապետն ու նրա ղեկավարած նոր կառավարությունն իրենց ծրագրերում մեծ ուշադրություն կդարձնեն մշակույթի ոլորտին վերաբերող օրենսդրությանը, հատկապես՝ մեկենասությանն ու հովանավորչությանը, աշխատանքներ տանեն մշակութային կրթությունը զարգացնելու ուղղությամբ:
«Կարևոր է, որ հասկական` այն ուղով, որ գնում է մեր հանրապետության տրամվայը, պետք է փոխվի: Եթե մենք շարունակենք հույս կապել միայն տրամվայի վարորդի փոխության հետ, ոչինչ չի ստացվի: Համակարգային փոփոխություններ են պետք: Մենք սովոր ենք, որ մեզ մոտ համակարգն է փոխում անձին, բայց եթե նոր վարչապետը կայուն լինի իր մտադրություններում, հենց առաջին քայլերից նա մեծ աջակցություն կստանա, որովհետև բոլորն են ուզում, որ երկրում դրական փոփոխություններ լինեն, անգամ «հները»»,- ասաց Ռուբեն Բաբայանը:
ՀՀ քաղաքացիներ
ՀՀ վարչապետ Հովիկ Աբրահամյանի հրաժարականը մեկնաբանել են նաև ՀՀ քաղաքացիները: Նրանցից շատերը հույս չունեն, որ նոր վարչապետը Հայաստանը կտանի զարգացման ուղիով, քանի որ խնդրի լուծումը կապում են համակարգային փոփոխության հետ։ Իսկ Աբրահամյանի հրաժարականից ամենաշատը մտահոգվել են նաիրիիտցիները. սեպտեմբերի 13-ին պետք է կայանար «Նաիրիտի» ներդրողների հետ վարչապետի հանդիպումը։ Հրաժարականի լուրով ամեն ինչ նաիրիտցիների համար գլխիվայր շուռ եկավ։
