Արմենուհի Մխոյան, Sputnik.
Նախ խցանները հավաքում են, ապա՝ մաքրում, տարբերակում ըստ գույնի, ապա հատուկ հիմքի վրա նկարում են պատկերն ու վրան ամրացնում խցանները: Ստացված խճանկարն էլ քաղաքի որևէ շենքի ճակատային հատվածի զարդն է դառնում: Հենց այսպես են պատրաստվել «Երազանքների օդապարիկն» ու «Անվասայլակով երեխան»:
«Գյումրին մեր տունն է» նախաձեռնության համահիմնադիր Արսեն Վարդանյանի խոսքով՝ խցաններով խճանկար սկսել են պատրաստել 2015 թվականից, բայց ոգևորությունը ծնվել է դեռ 2013 թվականին, երբ Արսենը Սլովենիայում տեսել է Գինեսի ռեկորդներում գրանցված՝ խցաններով պատրաստված ամենամեծ խճանկարը՝ 500 հազար խցանից պատրաստված:
«Ամեն ինչ լավ էր, բայց մի բան թերի էր. մարդիկ գնացել, գործարաններից էին խցաններ խնդրել: Իսկ մենք փորձեցինք հանդես գալ ավելի հետաքրքիր ձևաչափով՝ սկսեցինք խցաններ հավաքել փողոցներից, պատմամշակութային վայրերից: Հավաքում էինք և՛ պլաստմասսե, և՛մետաղական խցանները: Սկզբում որոշել էինք գերազանցել ռեկորդը, հետո փոխեցինք մեր նպատակը. եսասիրական դրսևորում կդիտվեր: Ռեկորդը լավ բան է, բայց մտածեցինք ավելի լավ է՝ մոզաիկաները փոքր, բայց շատ լինեն: Նույնիսկ կարելի է հետագայում Գյումրիում Սթրիթ-Արտ թանգարան ստեղծել: Իսկ ռեկորդ սահմանելը ոչ թե երազանք է, այլ՝ նպատակ: Ներկա պահին արդեն 120 հազար խցան ունենք, բայց գործընթացը շարունակվում է»,- նշեց Արսենը՝ ավելացնելով, որ ոչ թե խցանի կարիք ունեն, այլ՝ մարդկային գիտակցության բարձրացման ՝ չթափել, չկեղտոտել քաղաքը և գիտակցել, որ նույնիսկ խցանը կարող է տեսք ու շուք տալ քաղաքին:
«Գյումրին մեր տունն է, ու պետք է սրտացավ լինենք մեր քաղաքի նկատմամբ»,- ասաց Արմենը:
Նախաձեռնության նկատմամբ հետաքրքրությունն ավելի է մեծացել, երբ 2016 թվականի փետրվարին «Դեպի Հայք» կազմակերպության անդամների հետ քննարկման արդյունքում որոշվել է խճանկարներ պատրաստել հայկական գորգերի ձևաչափով:
«Բոլորս մեր տները զարդարում ենք հայկական գորգերով, ինչու՞ դուրսն էլ չզարդարենք գորգերով: Որոշեցինք ու արեցինք: Գաղափարը շատ հետաքրքիր է ու շատերին է ոգևորել: Կամավորներն ամեն ուրբաթ 10:00-17:00-ը գալիս են, ու միասին աշխատում ենք: Արդեն երեք խցանագորգ է պատրաստ»,- ասաց Արսենը վստահեցնելով, որ խցաններով խճանկարների թիվը Գյումրիում ավելանալու է:
«Այս ծրագրի շրջանակում ստեղծված գորգ-մոզաիկաները բոլորը Գյումրիում են մնալու, բայց եթե առաջարկներ լինեն այլ քաղաքների համար, մենք կպատրաստենք»,- նշեց Արսենը:
Դժվար է պատկերացնել, բայց սովորական խցաններից պատրաստած խճանկարները կարող են զարդարել նաև անշուք կառույցների պատերը:
Ստացում է՝ հետաքրքրությունների շրջանակը մեծացնելն ու ժամանակը արտասովոր զբաղմունքով լցնելն այնքան էլ դժվար չէ, հատկապես այն դեպքում, երբ այդ զբաղմունքի շնորհիվ հնարավոր է նաև գեղագիտական հաճույք պատճառել շրջապատին:
