ԵՐԵՎԱՆ, 9 սեպտեմբերի – Sputnik, Արմենուհի Մխոյան. Մինչ քարոզի մեկնարկն էլ արդեն իսկ պարզ էր` Գյումրիում թեժ, բայց միևնույն ժամանակ ցեխոտ է լինելու:
Քարոզի ժամանակ իրենց գովազդելու, իսկ հակառակորդի վրա ցեխ շպրտելու պայքարին մասնակցում է 10 կուսակցություն և 1 դաշինք. նմանատիպ բազմերանգ պայքար Գյումրին չէր ունեցել:
Այն, որ քաղաքի փողոցներին հատուկ ցեխառատ պայքար է լինելու, պարզ էր դեռ քարոզարշավի մեկնարկից առաջ. մեկը մյուսի կեղտոտ սպիտակեղենը դուրս հանելով` այսպես ասած «ֆեյք» կուսակցությունները չեն զլանում միմյանց հիշեցնել սև ու կուսակցական անցյալը, «լևի» հաստիքներն ու օճառային հատկությունները։ Իսկական թումանյանական «Շուն ու կատվի» վիճակ` էլ գող փիսո, էլ քաչալ շուն… Իսկ նժարին Գյումրու քաղաքապետի պաշտոնն է:
Այստեղ տեղին է հիշել Սուրբ Մարկոս ճգնավորի խոսքը` փոփոխված տարբերակով. «Ինչքան պայքարից հեռու, այնքան Աստծուն մոտ»:
