ԵՐԵՎԱՆ, 8 սեպտեմբերի — Sputnik. Մարաշում հայտնաբերված զենքի վերաբերյալ առաջին գործով սեպտեմբերի 8-ին հրապարակվեց մեղադրական դատավճիռ, հայտնում է pastinfo-ն:
Ամբաստանյալներ Հակոբ Հակոբյանը և Անուշավան Ավետիսյանը մեղավոր ճանաչվեցին ՀՀ քրեական օրենսգրքի 235-րդ հոդվածի 2-րդ մասով և դատապարտվեցին ազատազրկման՝ համապատասխանաբար 3.5 և 3 տարի ժամկետով, իսկ ամբաստանյալներ Ստեփան Չիլինգարյանը և Հարություն Հովհաննիսյանը մեղավոր ճանաչվեցին ՀՀ քրեական օրենսգրքի 235-րդ հոդվածի 1-ին մասով և դատապարտվեցին 1.5 տարվա ազատազրկման:
Բոլոր ամբաստանյալների նկատմամբ ընտրված խափանման միջոց կալանավորումը մնաց անփոփոխ՝ մինչև դատավճռի օրինական ուժի մեջ մտնելը:
Առգրավված զենքը, պայթուցիկ նյութերը և ռազմամթերքը կթողնվի ԱԱԾ տնօրինմանը:
Նշենք, որ գործի քննությունը ամբաստանյալների միջնորդությամբ անցկացվել է արագացված կարգով. բոլոր 4 ամբաստանյալներն ընդունել են առաջադրված մեղադրանքը:
Ըստ ԱԱԾ տեղեկության` խումբը սկսել է ձևավորվել 2015 թվականի մայիսից, իսկ հարձակումը նախատեսվում էր իրականացնել նույն թվականի ԱԺ նոյեմբերյան նստաշրջանից հետո։
