ԵՐԵՎԱՆ, 8 սեպտեմբերի — Sputnik. ՀՀ կառավարության աշխատակազմի ղեկավար-նախարար Դավիթ Հարությունյանը սեպտեմբերի 7-ին նամակ է գրել «Նաիրիտի» վերագործարկման համար 150 մլն դոլարի ներդրում անելու ցանկություն հայտնած գործարար Աշոտ Գրիգորյանին` հայտնելով անսպասելի լուրը` Հովիկ Աբրահամյանը հաջորդ օրը հրաժարական է տալիս։ Այս մասին Sputnik Արմենիային հայտնեցին «Նաիրիտի» նախկին աշխատակիցները։
Նրանցից մեկը` Կարինե Շահվերդյանն ասաց, որ «շոկի մեջ» են հայտնվել, երբ իմացել են նորությունը։ Եվ հարցը ոչ թե անձի փոփոխումն է, այլ դրանով կրկին ձգձգվում է «Նաիրիտի» հարցը։
«Որևէ մեկի նշանակումը չեմ ուզում անձնավորել։ Կարևորն այն է, որ ով լինի, պարտավոր է լսել նաիրիտցիներին, «Նաիրիտի» հարցը պահի ուշադրության կենտրոնում, և մենք հասնենք, կամ ինքը մեր ուժերով ու մեր օգնությամբ հասնի այն բանին, որ վերջապես «Նաիրիտը» վերագործարկվի»,- ասաց նա։
Նա ցավով նշեց, որ գործարանում ներդրումներ կատարելու պատրաստ 11 հոգանոց պատվիրակության ավիատոմսերն արդեն գնված էին, իսկ հյուրանոցային համարները` ամրագրված։ Հիմա ամեն ինչ ի չիք է դարձել` ցնցող լուրի պատճառով։ Մյուս աշխատակիցն էլ պատմեց, որ իր կյանքի երազանքն է` մի կողմ դնել բողոքի դրոշակն ու փոխարենը ձեռքը վերցնել աշխատանքային գործիքը։
«Ինձ համար կարևորն այն է, որ վերագործարկեն «Նաիրիտը», գնանք, աշխատենք, հանրապետության համար ստեղծենք բերք ու բարիք։ Ես կուզենայի, որ նրանք ունենային հայրենասիրություն, զարկ տային արդյունաբերությանը»,- պատմեց նախկին աշխատակիցը։
Նրա խորին համոզմամբ` Հայաստանն առանց արդյունաբերության, հատկապես` «Նաիրիտի» գնում է կործանման։
