ԵՐԵՎԱՆ, 7 սեպտեմբերի — Sputnik. Նապոլեոնը խոստովանել է, որ այդ ճակատամարտում ֆրանսիացիները ցուցադրեցին իրենց հմտությունները, իսկ ռուսները պայքարեցին անպարտ մնալու իրենց իրավունքի համար։ Ընդ որում` քչերին է հայտնի, որ Բորոդինյան ճակատամարտում ներդրում են ունեցել նաև հայերը։
Գիտնական, տուրիզմի հայկական ինստիտուտի (Ռուսաստանի տուրիզմի միջազգային ակադեմիայի մասնաճյուղ) ռեկտոր Ռոբերտ Մինասյանը Sputnik Արմենիայի եթերում պատմեց, որ ХIХ դարի սկզբին ռուսական կայսրության տարածքում հայերը հիմնականում բնակվում էին Աստրախանի նահանգում։
Երբ ճակամարտը սկսվել է, նրանք որոշել են օգնել բանակին։ Մինասյանը հիշեցրեց, որ ռուսական բանակն այդ ժամանակ Կովկասում պատերազմում էր նաև պարսիկների դեմ։ Այնտեղ էր կենտրոնացած տասը հազարանոց ռուսական բանակը։
«Ալեքսանդր I-ը կարգադրել էր, որ ռազմական գործողություններին ոչ մի զինվոր չմասնակցի Կովկասից։ Այսինքն արքան հասկանում էր հայերի պաշտպանության կարևորությունը», — ընդգծեց գիտնականը։
Որպես երախտագիտության նշան`Աստրախանի հայերը ռուսական բանակի կարիքների համար հավաքել են 100340 ռուբլի և փոխանցել գանձարան։ Արխիվային փաստաթղթերը վկայում են, որ գումարը ոսկեդրամներով է եղել։
«Այսօրվա չափանիշներով մոտ 1 մլրդ դոլար է կազմում։ Ռուսաստանի համար լինել-չլինելու հարց էր դրված, և ահա ռուսական կայսրության հպատակ հայերը օգնության ձեռք մեկնեցին», — ասաց Մինասյանը։
Նրա խոսքով` Բորոդինյան ճակատամարտի 200-ամյա հոբելյանին ընդառաջ Հայաստանում ցուցահանդես է կազմակերպվել, որտեղ ներկայացվել են բարեգործական գումարի տրամադրման փաստն ապացուցող արխիվային փաստաթղթերը։ Ցուցահանդեսից հետո նաև գիրք է լույս տեսել, որը պատմում է 1812 թվականի հայրենական պատերազմում հայերի մասնակցության մասին։
