ԵՐԵՎԱՆ, 6 սեպտեմբերի — Sputnik. Ազգային ժողովում լրագրողների հետ զրույցում Շավարշ Քոչարյանն ասաց, որ Լեռնային Ղարաբաղի հակամարտության կարգավորման հարցում առաջընթաց չի արձանագրվում մի շատ պարզ պատճառով. Ադրբեջանը նույնիսկ սեղանի շուրջ ձեռք բերված պայմանավորվածություններն է կոպտորեն խախտում։
«Քսան տարուց ավելի է` մենք այս գործընթացի մեջ ենք: Պարբերաբար լինում են հանդիպումներ, բայց բոլորդ գիտեք, որ Ադրբեջանը խախտում է նույնիսկ այն պայմանավորվածությունները, որոնք սեղանի շուրջ են ձեռք բերվել: Ասվածի վառ վկայությունը Վիեննայում և Սանկտ Պետերբուրգում տեղի ունեցած հանդիպումներն են, որոնց ընթացքում պայմանավորվածություն է ձեռք բերվել` պահպանել կայունություն շփման գծում, սակայն իրականում Ադրբեջանն, ըստ էության, խախտում է պայմանավորվածությունները»,- ասաց Քոչարյանը:
Առաջիկա հանդիպման վերաբերյալ ակնկալիքների մասին փոխարտգործնախարարն ասաց.
«Ի՞նչ ակնկալիքներ, երբ նույն պրոցեսի մեջ ենք 20 տարուց ավելի: Ակնկալիք կարող է լինել այն դեպքում, երբ Ադրբեջանը փոխի իր ապակառուցողական մոտեցումը: Տրամաբանական է. քանի կրակում են, քանի սադրում են, անհնար է կարգավորման շուրջ բանակցություններում արձանագրել առաջընթաց»:
