ԵՐԵՎԱՆ, 5 սեպտեմբերի — Sputnik. ՀՀ գյուղատնտեսության նախարարության սննդամթերքի անվտանգության պետական ծառայությունն արգելել է Ուկրաինայից Հայաստանի Հանրապետություն ներմուծել կենդանի խոզեր, նրանց գենետիկական նյութերը, խոզի մսի և այլ սննդային հումք, վայրի խոզի միս, իրենց բաղադրության մեջ խոզի միս պարունակող պատրաստի արտադրանքներ։
Արգելված է նաև եղջյուրակճղակային, կաշվե, աղիքային հումք, որսորդական հաղթանշաններ, խոզերի կերակրման համար բոլոր տեսակի կերեր (բացառությամբ սինթետիկ և քիմիական նյութեր պարունակող լրացակերերը) ներմուծելը:
Հրամանի նպատակն է՝ կանխել Ուկրաինայում արձանագրված խոզերի աֆրիկական ժանտախտ հիվանդության մուտքը Հայաստան:
Ուկրաինայում այդ հիվանդության արձանագրման մասին է վկայում Կենդանիների առողջության համաշխարհային կազմակերպության (OIE) պաշտոնական կայքէջում հրապարակված տեղեկատվությունը:
Sputnik Արմենիան նույնպես օրերս ահազանգել էր այդ մասին։ Հայաստանում՝ Տավուշի մարզում, գրանցվել է խոզերի ոչնչացում կերից։ Լաբորատոր հետազոտությունը հաստատել է տվյալ կերի վտանգավոր լինելը։
Արդյո՞ք ուկրաինական ծագման է եղել կերը և աֆիկյան ժանտախտն է թունավորման պատճառ հանդիսացել, թե՞ այլ հիվանդություն, պարզ կլինի հետագա ուսումնասիրությունների արդյունքում։
