Ալինա Գրբաշյան, Sputnik.
Դուբայն, ի դեպ, հենց դրանով էլ գրավում է զբոսաշրջիկներին ու ոչ միայն նրանց: Այստեղ մարդիկ ժամանում են հանգստանալու և աշխատելու աշխարհի բոլոր ծայրերից:
Դուբայում կարելի է հանդիպել շատ հայերի, որոնք այստեղ են գալիս ոչ միայն հանգստանալու, այլև աշխատելու նպատակով։
Այս հիրավի զարմանահրաշ քաղաքում մեկշաբաթյա հանգիստը, իհարկե, մեծ ժամկետ չէ: Փոխարենը տպավորություններն անսահման են: Ամենից առաջ քեզ ապշեցնում է Դուբայի ճարտարապետությունը:
Այս քաղաքում հին մզիկթների կողքին երկնաքերներ են, որոնք կառուցվել են գերժամանակակից ճապոնական տեխնոլոգիաներով:
Դուբայը խաղաղ և հանգիստ է թվում. այստեղ դուք բարձրաձայն խոսակցություն երբեք չեք լսի, չեք հանդիպի մարդկանց, որոնք ինչ-որ բան են գոռում բջջային հեռախոսով։ Թերևս հատուկենտ արտասահմանցիներն են միայն, որը տեղյակ չեն այստեղի բարքերին:
Միևնույն ժամանակ, Դուբայը աշխույժ առևտրային ու զբոսաշրջային կենտրոն է:
Ինչպես խոստովանում են հենց Դուբայի բնակիչները, Արաբական Միացյալ Էմիրությունների կառավարությունն ամեն կերպ խթանում է տնտեսության զարգացումը, անհրաժեշտ պայմաններ ստեղծում իր քաղաքացիների համար. անվճար բնակարան, առողջապահություն, կրթություն:
Արևելքը նուրբ գործ է
Աչքի են զարնում նաև հենց Դուբայի բնակիչները: Տղամարդիկ կրում են բացառապես սպիտակ հագուստ, իսկ կանայք՝ սև, ասես շախմատի ֆիգուրներ: Ինչպես պատմեց մեր էքսկուրսավարը, դա իր բացատրությունն ունի:
Տղամարդը հին ժամանակներից համարվել է ընտանիքը պահողը, որը ժամանակի մեծ մասն անցկացրել է արև տակ՝ զբաղվելով որսորդությամբ: Ահա և ստիպված է եղել կրել սպիտակ հագուստ, որպեսզի պաշտպանվի արևի կիզիչ ճառագայթներից, իսկ կինն ընտանեկան օջախի պահապանն է (ինչպես հայերի մոտ):
Տնային գործերի ժամանակ արաբ կանայք նախընտրում են սև հագուստ՝ բաց կամ փակ դեմքով: Ի դեպ, դեմքը բացելը կամ փակելը հենց կանանց ընտրությունն է: Ոչ ոք չի ստիպում նրանց կրել այս կամ այն հագուստը:
Միևնույն ժամանակ, գեղեցիկ սեռի ներկայացուցիչները, չնայած նրան, որ առանձին օրեր ունեն լողափ այցելելու համար (երկուշաբթի և չորեշքաբթի), մեծ հարգանք ու պատիվ են վայելում: Դե, ինչպես հայտնի է՝ Արևելքը նուրբ գործ է:
Դուբայի գլխավոր տեսարժան վայրերից մեկը ոսկու շուկան է: Նրա չափերը և ապրանքի քանակը, էլ չասած ոսկյա զարդերի արտասովոր ձևերի մասին, ուղղակի ապշեցնում են: Այդ շուկայում ամեն ինչ ոսկուց է՝ հագուստից մինչև լողազգեստներ, ապարանջաններից մինչև մատանիներ:
Սաֆարի տուրն առանձին թեմա է: Ի դեպ, այն վաճառեց մեզ մեր հայրենակիցը, որն աշխատում է ռուսական զբոսաշրջային գործակալությունում:
Սաֆարին միայն ճանապարհորդություն չէ ավազաբլուրներով, այլ նաև այցելություն բեդվինների ճամբար, որտեղ կարող ես զբոսնել ուղտերով, ընթրել և վայելել պորտապար:
Դուբայի երկնաքերները, երգող շատրվանները և արաբների հայկական հյուրընկալությունը
Անջնջելի տպավորություն է թողնում նաև էքսկուրսիան քաղաքում: Մենք, իհարկե, չէինք կարող չդիտել աշխարհի ամենաբարձր շենքը, ամենամեծ շատրվանները, աշխարհում նմանը չունեցող արմավենիների կղզիները, աշխարհի ամենամեծ փակ ակվարիումը և առևտրի ամենամեծ կենտրոնը:
Բուրջ Խալիֆան աշխարհի ամենաբարձր շենքն է: Այն հատկապես տպավորիչ է գիշերը. լույսերով ողողված հսկա երկնաքերը մխրճվում է ամպերի մեջ… Դրա հարևանությամբ են գտնվում երգող շատրվանները:
Դժվարությամբ ես հավատում, որ գրեթե 40 տարվա ընթացքում ոչ մեծ նավահանգստային քաղաքը, որի բնակիչները զբաղվել են մարգարտի արդյունահանմամբ, վերածվել է հիրավի դրախտային անկյունի, աշխարհում խոշորագույն զբոսաշրջային և առևտրային կենտրոնի՝ հսկա երկնաքերներով ու արմավենիների արհեստական կղզիներով:
Մենք եղանք նաև շեյխի պալատի տարածքում: Պալատի կամարի տակ հինգ ձիու քանդակ կա: Պարզվեց, որ շեյխը շատ է սիրում ձիեր ու կազմակերպում է ձիարշավներ: Դրանք անցկացվում են ամեն տարի մարտի վերջին շաբաթը:
Շեյխի Զաբել անունով ձին հինգ անգամ հաղթել է ձիարշավներում: Ի նշան հաղթանակների և ի պատիվ սիրելի ձիու՝ շեյխը որոշել է այդ կերպ զարդարել իր պալատի կամարը:
Բոլոր արաբները շատ հյուրընկալ են, ինչով էլ շատ նման են հայերին: Նրանց տան դուռը միշտ բաց է: Դա վերաբերում է նաև շեյխերին:
Այստեղ ճամփորդին միշտ կհյուրասիրեն արաբական սուրճով, համեղ և սննդարար արմավներով, կթողնեն հանգստանաս և հետո միայն կհարցնեն, թե ով ես և ինչու ես եկել:
Վերջերս իմացա, որ Դուբայում տարեվերջին կբացվի այգի, որտեղ կլինեն կոկորդիլոսներ, ընդ որում բնական միջավայրում:
Մի խոսքով, մեկ անգամ լինելով Դուբայում՝ դու կցանկանաս վերադառնալ այնտեղ: Հիրավի, սա դրախտային անկյուն է:
