ԵՐԵՎԱՆ, 3 սեպտեմբերի — Sputnik, Լաուրա Սարգսյան. Հայաստանը և Ռուսաստանը պետք է ավելի ինտեսնիվ զարգացնեն երկկողմանի մշակութային կապերը, կարծում է Ռուսաստանի մշակույթի փոխնախարար Սերգեյ Օբրիվալինը, ով Երևանում է Հայաստանում Ռուսաստանի մշակույթի օրերի շրջանակում:
«Մեր միջմշակութային համագործակցությունը բարձր մակարդակի վրա է, սակայն, անհրաժեշտ է էլ ավելի աշխուժացնել այն` լրացնելով մի շարք երկկողմանի միջոցառումներով, օրինակ` մշակույթի և արվեստի գործիչների փոխայցերով», — Sputnik Արմենիայի թղթակցի հետ զրույցում ասաց Օբրիվալինը:
Նա խոստովանեց, որ Երևան է ժամանել մի քանի ժամ առաջ և արդեն հասցրել է լինել Փարաջանովի թանգարանում ու Հայաստանի պատմության թանգարանում դիտել «Ընտանիքը Եվրասիայի մշակույթում. 20-րդ դար» ցուցահանդեսին ներկայացված ցուցանմուշները:
«Հայաստանը հին քաղաքակրթություն է, որտեղ շատ վառ գույներ կան: Հավանաբար, հաջորդ անգամ այստեղ կգամ ոչ թե գործուղման, այլ արձակուրդս անցկացնելու։ Շատ հայ ընկերներ ունեմ: Հայաստանն ինձ շատ հոգեհարազատ երկիր է», — նշեց փոխնախարարը:
Մշակույթի ոլորտում երկկողմ համագործակցության ակտիվացումը Հայաստանում Ռուսաստանի գործերի ժամանակավոր հավատարմատար Անդրեյ Իվանովը կապում է այդ թվում ԵՏՄ-ին Հայաստանի անդամակցության հետ:
«Վերջին երկու-երեք տարիներին տեղի է ունենում մշակութային, հումանիտար շփումների ակտիվացում, ինչը կապված է ԵՏՄ-ին Հայաստանի անդամակցության հետ»,- նշեց Իվանովը:
Նրա խոսքով` ներկա պահին կողմերն աշխատում են հայ-ռուսական մշակութային կապերի խորացման ուղղությամբ:
«Հաճելի է տեսնել այդ դրական շարժը: Այստեղ վերջին մեկ տարվա ընթացքում եղել է Ռուսաստանի մշակույթի նախարարը, և այսօր ժամանել է նաև փոխնախարար Օբրիվալինը: Նրանք զգացել են Հայաստանի և նրա քաղաքացիների ջերմությունն ու բարությունը»,- եզրափակեց իր խոսքը Իվանովը:
Ոչ պաշտոնապես Հայաստանում Ռուսաստանի մշակույթի օրերը մեկնարկել են օգոստոսի 20-ին Գյումրիում: Սակայն բացման պաշտոնական արարողությունն սկսվել է այսօր` Հայաստանի պատմության թանգարանում անցկացվող «Ընտանիքը Եվրասիայի մշակույթում. 20-րդ դար» ցուցահանդեսով։
Նույն օրը Հայաստանի պետական ֆիլհարմոնիայի նախասրահում անցկացվեց մանկական նկարների ցուցահանդես, Արամ Խաչատրյանի անվան համերգասրահում` գալա-համերգ` Ռուսաստանից ժամանած երգչախմբերի և երաժիշտների մասնակցությամբ:
Ռուսաստանի մշակույթի օրերի շրջանակում կանցկացվի կինոյի շաբաթ, ցուցադրվելիք կինոնկարների թվում հանդիսատեսը կկարողանա դիտել նաև ռուսական հայտնի «Անձնակազմ» ֆիլմը: Ծրագրում նախատեսված են նաև վարպետության դասեր, ինչպես նաև կանցկացվեն ստեղծագործական երեկոներ:
