ԵՐԵՎԱՆ, 3 սեպտեմբերի — Sputnik, Լաուրա Սարգսյան. Լոռու մարզը հայտնի է ոչ միայն հետաքրքիր մարդկանցով և պայծառ ուղեղներով, այլև աննկարագրելի գեղեցիկ բնությամբ և մաքուր օդով:
Ճանապարհի մի երկայնքով ձգվում է Մարգահովիտ գյուղը, իսկ մյուս կողմում սարերն են, որոնց վրա 55 հազար ծառերից բաղկացած Հրանտ Դինքի անվան անտառն է:
«Սա 22 անտառներից ամենախոշորն է, իսկ մարդու հիշատակի նման հավերժացումը գեղեցիկ քայլ է», — Sputnik Արմենիայի թղթակցի հետ զրույցում ասաց «ԷյԹիՓի» բարեգործական հիմնադրամի հասարակայնության հետ կապերի բաժնի ղեկավար Քրիստինե Հովսեփյանը:
Նրա խոսքով` անտառները հիմնականում գտնվում են Լոռու և Շիրակի մարզերում: Դրանք բոլորը տնկել են Armenia Tree Project ծրագրի շրջանակում, որը հեռավոր 1994 թվականին հիմնել էր բոստոնահայ բարերար Քերոլայն Նուգարը:
«90-ականների սկզբին մարդիկ սկսեցին հատել ծառերն ու անտառները տաքանալու համար: Այս ամենը տեսնելով` Նուգարը որոշեց Հայաստան բերել տարածքի կանաչապատման ծրագիրը», — ասաց Armenian Tree Project բարեգործական հիմնադրամի հայկական մասնաճյուղի ղեկավար Լուսինե Քասարջյանը:
1994 թվականից արդեն տնկվել է ավելի քան 5 մլն ծառ, կանաչապատվել` 1090 տարածք, այդ թվում` Երևանի եկեղեցիների 80 բակ:
Կանաչապատմանն ակտիվ մասնակցություն ունի հինգ տարի առաջ ստեղծված Օհանյան կենտրոնը, որը մասնաճյուղերն ունի ինչպես Մարգահովիտ, այնպես էլ Կարին գյուղերում:
