ԵՐԵՎԱՆ, 3 սեպտեմբերի — Sputnik. «Երկրաշարժ» ֆիլմի պրոդյուսեր, «Մարս Մեդիա» ընկերության ղեկավար Ռուբեն Դիշդիշյանը շնորհակալություն է հայտնել Հայկական ազգային կինոակադեմիային` ֆիլմն Օսկարի ներկայացնելու համար, այդ մասին նա գրել է Ֆեյսբուքի իր էջում։
«Բարեկամնե՛ր, սա անհավանական նորություն է։ Բայց մեր «Երկրաշարժ» ֆիլմը Հայկական կինոակադեմիան ներկայացրել է Օսկարի։ Մենք երջանիկ ենք։ Շատ մեծ շնորհակալություն Հայաստանի ակադեմիկոսներին վստահության համար։ Կաշխատենք այն արդարացնել։ Առջևում դեռ մեծ ճանապարհ կա, բայց այն սկսվել է։ Շնորհակալություն ֆիլմի բոլոր ստեղծողներին և մասնակիցներին, հատկապես ռեժիսոր Սարիկ Անդրեասյանին»,- գրել է Դիշդիշյանը։
Նշենք, որ Հայկական ազգային կինոակադեմիայի անդամները փակ քվեարկության արդյունքում շաբաթ օրը որոշեցին Հայաստանի կողմից «Օսկարի» կինոմրցանակաբաշխության «Լավագույն օտարալեզու ֆիլմ» անվանակարգում ներկայացնել Սարիկ Անդրեասյանի «Երկրաշարժ» ֆիլմը:
Հայկական ազգային կինոակադեմիան ստացել էր երեք ֆիլմի հայտ՝ Դավիթ Սաֆարյանի «Տաք երկիր, ցուրտ ձմեռ», Սարիկ Անդրեասյանի «Երկրաշարժ» և Ջիվան Ավետիսյանի «Վերջին բնակիչը» ֆիլմերը:
«Երկրաշարժ» ֆիլմում բնական աղետի ֆոնին ծավալվում է երկու հերոսների` 45-ամյա Կոնստանտին Բերեժնոյի և 20-ամյա Ռոբերտ Մելքոնյանի պատմությունը։ Ճակատագրի դիպվածով` սա նրանց առաջին հանդիպումը չէ. տարիներ առաջ Բերեժնոյի մեղքով Ռոբերտի ծնողները զոհվել էին ավտովթարից։
Կոնստանտինը մի քանի տարի անցկացրել է բանտում, իսկ փոքրիկ Ռոբերտին ապաստան են տվել ազգականները։ Եվ ինչն է սարսափելին… Բերեժնոյը վերադառնում է իր ընտանիքի մոտ հենց սարսափելի երկրաշարժի օրը. նրան սպասում են կինը, աղջիկը, որդին… և Ռոբերտը, որն այդպես էլ չի ներել նրան։ Ճակատագրի հեգնանքով հերոսները հայտնվում են նույն փրկարարական ջոկատում, բայց միանգամից չեն ճանաչում միմյանց։
