ԵՐԵՎԱՆ, 3 սեպտեմբերի — Sputnik. Հայաստանի նախագահ Սերժ Սարգսյանը ցավակցական հեռագիր է հղել Ուզբեկստանի ժողովրդին և ղեկավարությանը` նրանց համար ծանր կորստի` Ուզբեկստանի նախագահ Իսլամ Քարիմովի մահվան կապակցությամբ, հայտնում են երկրի ղեկավարի մամուլի ծառայությունից։
Ժամանակակից Ուզբեկստանի պետականության զարգացման գործում կարևորելով երկար տարիներ այդ երկրի առաջնորդը եղած Իսլամ Քարիմովի դերը` ՀՀ նախագահը համոզվածություն է հայտնել, որ Ուզբեկստանի ժողովրդին հատուկ տոկունությունն ու կյանքի էներգիան թույլ կտան հաղթահարել այս ծանր փորձությունը, էլ ավելի ամուր համախմբվել հանուն Ուզբեկստանի Հանրապետության ամրապնդման ու բարգավաճման:
«Կիսում եմ Ուզբեկստանի ժողովրդի, Իսլամ Քարիմովի ընտանիքի և հարազատների խորը վիշտը, փոխանցում եմ կարեկցանքի և զորակցության խոսքեր»,- ասված է նախագահ Սարգսյանի ցավակցական հեռագրում:
Իսլամ Քարիմովը վախճանվել է 79 տարեկանում, նրա հուղարկավորությունը տեղի կունենա Սամարղանդում սեպտեմբերի 3-ին։ Նախագահի մահվան կապակցությամբ երկրում եռօրյա սուգ է հայտարարվել։
