ԵՐԵՎԱՆ, 3 սեպտեմբերի — Sputnik. Երևանի Մ. Մաշտոցի անվան Մատենադարանի տնօրեն Հրաչյա Թամրազյանն է մահացել գիշերը։ Նա ուներ ծանր հիվանդություն և երկար ժամանակ բուժվում էր:
Հրաչյա Թամրազյանը ծնվել է 1953 թ-ին Երևանում, ավարտել է Երևանի պետական համալսարանի բանասիրական ֆակուլտետը, 1977 թ. աշխատանքի է անցել Երևանի Մեսրոպ Մաշտոցի անվան Մատենադարանում` որպես ավագ լաբորանտ, այնուհետև` կրտսեր ու ավագ գիտաշխատող։ 1988-91 թթ. Թամրազյանն աշխատել է «Սովետական գրող» հրատարակչությունում՝ որպես գլխավոր խմբագիր, իսկ 1991-93 թթ. զբաղեցրել է «Նաիրի›› հրատարակչության տնօրենի պաշտոնը։ 1986 թվականից Գրողների միության անդամ է։
1993 թ. նշանակվել է ՀՀ կառավարությանն առընթեր Հրատարակչական գործերի վարչության պետ, իսկ 1995-1997 թթ. ղեկավարել է ՀՀ տեղեկատվության նախարարությունը։ 1999 թ. ստացել է բանասիրական գիտությունների դոկտորի գիտական աստիճան։ 2007 թվականից զբաղեցնում է Մատենադարանի տնօրենի պաշտոնը։ 2014 թվականից Հայաստանի գիտությունների ազգային ակադեմիայի թղթակից անդամ է։
Հրաչյա Թամրազյանը բազմաթիվ մենագրությունների, գիտական հոդվածների և ուսումնասիրությունների հեղինակ է։ Նրա ուսումնասիրությունները հիմնականում առնչվում են միջնադարագիտության, մասնավորապես, նարեկացիագիտության բնագավառին։ Թամրազյանը նաև ճանաչված բանաստեղծ է, թարգմանիչ։
