ԵՐԵՎԱՆ, 2 սեպտեմբերի — Sputnik. «Ոստան հայոց» խմբի բասկիթառահար Արեգ Նազարյանի հեղինակած ՙԱրցախ, լսիր՚ երգը գրվել է շուրջ 25 տարի առաջ` արցախյան գոյամարտի օրերին: Այս տարի երգի հիման վրա նկարահանվեց տեսահոլովակ, և օգտագործվեցին հունիսի 5-ին Տաթևի ճոպանուղում նկարահանված կադրերը, որոնցում բարձունքից ճախրող աշխարհահռչակ բեյսջանփերները բացում են Արցախի դրոշը:
Տեսահոլովակի պրոդյուսեր, միջազգայնագետ Սուրեն Սարգսյանը Sputnik Արմենիա ռադիոկայանին տված հարցազրույցում պատմեց, որ երգը, թեև շատ ճանաչված ու սիրված էր 90-ականներին, բայց ձայնագրված չէր, ՙՈստան հայոցն՚ այն երգում էր երևանյան ակումբներում բացառապես կենդանի կատարմամբ: Մեկ տարի առաջ երգն արդեն ժամանակակից, բարձրորակ ձայնագրություն ունեցավ, ինչից հետո որոշվեց դրա հիման վրա նաև տեսահոլովակ նկարահանել:
«Գորիսում անցկացված բեյսջամփերների փառատոնը ռոք երաժշտությունն ու էքստրեմալ սպորտը միավորելու գաղափար ծնեց»,- ասաց Սուրեն Սարգսյանը՝ նշելով, որ ԼՂ դրոշը ծածանող բեյսջամփերները խորհրդանշական զուգադիպությամբ ԱՄՆ, Ֆրանսիայի ու ՌԴ քաղաքացիներ են եղել, ասել է թե՝ ԼՂ խնդրի կարգավորմամբ զբաղվող ԵԱՀԿ ՄԽ համանախագահող երկրների ներկայացուցիչներ:
«Ոստան հայոց» խումբն այս տարի իր 30-ամյա հոբելյանն է նշում, որի կապակցությամբ ծրագրում է տոնական համերգով հանդես գալ ԼՂՀ-ում: Ինչ վերաբերում է ռոքի նկատմամբ հայ երաժշտասերների առերևույթ մարող հետաքրքրությանը, Սուրեն Սարգսյանը այդ դիտարկման հետ համաձայն է, բայց և վստահ է, որ հայաստանյան ռոք խմբերը շարունակում են գործել, համագործակցել ու լուրջ ապագա են ունենալու ոչ միայն մեր երկրում, այլև արտասահմանում:
