ԵՐԵՎԱՆ, 1 սեպտեմբերի — Sputnik. ՅՈՒՆԻՍԵՖ-ն այսօր հրապարակել է դպրոցական կրթության հնարավորությունից զրկված երեխաների ամենաբարձր ցուցանիշ ունեցող երկրների տասնյակը:
Այն գլխավորում է Լիբերիան, որտեղ, ըստ կազմակերպության տվյալների, դպրոցահասակ երեխաների գրեթե երկու երրորդը դպրոց չի հաճախում:
Երկրորդ տեղում Հարավային Սուդանն է: Այնտեղ կրթությունից դուրս է երեխաների 59 տոկոսը: Այդ երկրի յուրաքանչյուր 3-րդ դպրոց ճգնաժամի պատճառով այսօր փակ է:
Աֆղանստանում դպրոց չի հաճախում երեխաների 46 տոկոսը, Սուդանում՝ 45, Նիգերում՝ 38, իսկ Նիգերիայում՝ 34:
Սիրիան, թեև այս երկրների տասնյակում չի ընդգրկվել, բայց, ըստ ՅՈՒՆԻՍԵՖ-ի, այդ երկրում 2,1 միլիոն երեխա այսօր զրկված է դպրոց հաճախելու հնարավորությունից: Դպրոց չի հաճախում այդ երկրից հեռացած շուրջ 600 հազար փախստական երեխա:
Հետազոտության հեղինակներին վիճակագրական տվյալներ ստանալ չի հաջողվել Սոմալիից և Լիբիայից ՝ այդ երկրներում շարունակվող հակամարտությունների պատճառով:
Ամփոփելով ներկայացված տվյալները, վերլուծության հեղինակները մտավախություն են հայտնում, որ այսօր կրթություն չստացող սերունդն ապագայում զրկված է լինելու իր երկրների տնտեսությունը զարգացնելու հնարավորությունից, ինչն էլ ավելի է վատթարացնելու այդ երկրների ապագա սերունդների վիճակը:
