ԵՐԵՎԱՆ, 30 օգոստոսի — Sputnik. Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում մեղադրող դատախազ Արմեն Փանոսյանն այսօր հրապարակել է 2015թ-ին Նորք-Մարաշում վնասազերծված հանցավոր խմբի մի քանի անդամների դեմ հարուցված քրեական գործի մեղադրական եզրակացությունը:
Հանցավոր խմբի կազմում ապօրինի զենք-զինամթերք ձեռք բերելու, պահելու, իրացնելու համար մեղադրվող դատախազը դատարանին միջնորդել է Հակոբ Հակոբյանին դատապարտել 4, Հարություն Հովհաննիսյանին՝ 1 տարի 10 ամիս, Ստեփան Չիլինգարյանին՝ 2 տարի և Անուշավան Ավետիսյանին՝ 3 տարի վեց ամիս ժամկետով ազատազրկման:
Քրեական գործի նյութերով` 2015թ. հուլիսին Արթուր Վարդանյանը Հակոբ Հակոբյանին առաջարկել է որոշակի վարձատրության դիմաց զենք հայթայթել և իրեն վաճառել:
Նույն առաջարկով նա դիմել է նաև Գյումրու բնակիչ Անուշավան Ավետիսյանին, որից հետո նրանք ձեռնամուխ են եղել այդ առաջարկը կատարելուն:
Մեկ ամիս անց Անուշավան Ավետիսյանը Գյումրիում զենք-զինամթերք է գնել Հարություն Հովհաննիսյանից՝ նրան վճարելով 900 ԱՄՆ դոլար:
Իսկ Ստեփան Չիլինգարյանն Անուշավան Ավետիսյանին զենք է վաճառել 4700 ԱՄՆ դոլարով:
Մեղադրյալները դատարանում իրենց մեղավոր են ճանաչել ու դատարանին միջնորդել գործը քննել արագացված կարգով: Դատական հաջորդ նիստում դատարանում կներկայացվեն պաշտպանների պաշտպանական ճառերը:
