ԵՐԵՎԱՆ, 30 օգոստոսի — Sputnik. 5-րդ դասարանցի Արմանն այս տարի առաջին անգամ է սեպտեմբերի 1-ին դպրոց գնալու մենակ՝ առանց ծնողների ուղեկցության: Արմանը հպարտորեն պատմում է, որ իրեն արդեն երկու ամիս է, ինչ վստահում են տնից մենակ դուրս գալ ու փողոց անցնել: Իսկ երթևեկության կանոնները տղան լավ գիտի:
«Պետք է հասնեմ անցումին ու սպասեմ մինչև կանաչ լույսը վառվի, նոր կարող եմ անցնել»,-ասում է նա:
Արմանի համադասարանցիներից շատերի ծնողները, որոնք այսօր երեխաներին դպրոց էին ուղեկցել` դասագրքեր ստանալու, խոստովանեցին, որ դեռ խուսափում են երեխաներին միայնակ դպրոց ուղարկել: Կանանցից մեկն անգամ կես լուրջ-կես կատակ նշեց, որ եթե ամոթ չլիներ, մինչև 25 տարեկանն էլ դստեր ձեռքը բռնած կանցկացներ փողոցը:
Երեխաների անվտանգ երթևեկությունն ապահովելու համար ոստիկանությունը սեպտեմբերի 1-ից հայտարարում է արդեն ավանդական դարձած անվտանգ երթևեկության միամսյակը:
«Սեպտեմբերի 1-ից սկսած` ամբողջ հանրապետության տարածքում, բոլոր այն դպրոցների մոտ, որոնք գտնվում են փողոցների ու ճանապարհների վրա, ոստիկանության աշխատակիցները պարեկություն են իրականացնելու»,- հայտարարեց Ճանապարհային ոստիկանության ճանապարհապարեկային ծառայության բաժնի պետ, ոստիկանության գնդապետ Նորիկ Սարգսյանը:
Ոստիկանության պաշտոնյայի խոսքով` դպրոցների մոտ հերթապահող ոստիկանների համար խնդիրներ են հարուցում ոչ այնքան երեխաները, որքան նրանց ուղեկցող ավտոմեքենաների վարորդները, հատկապես, եթե մեկ երեխայի դպրոց է ուղեկցում երկու- երեք ավտոմեքենա:
«Ունենք դպրոցներ, որտեղ ծնողները երեխաներին 2-3 ավտոմեքենայով են դպրոց բերում, փորձում են 5-10 րոպե կանգնել մինչև երեխային դասարան հասցնեն: Այս խնդիրը կա Չեխովի, Պուշկինի, Աղայանի անվան դպրոցներում, որտեղ երեխաներին բերում են 2-3 երեխաներով ու ընդամենը 10 ավտոմեքենայի համար նախատեսված կայանատեղում 100 ավտոմեքենա է կուտակվում»,- ասաց Նորիկ Սարգսյանը՝ նշելով, որ այսպիսի դպրոցների մոտ տեղադրվել են տեսախցիկներ՝ ճանապարհային երթևեկությունը կարգավորելու նպատակով:
Մի շարք դպրոցների մոտ էլ տեղադրվել ու վաղվանից գործելու են արագությունը մինչև 40 կմ/ժամ սահմանափակող նշաններ ու տեսախցիկներ:
2011թ-ից ի վեր Հայաստանում ճանապարհատրանսպորտային պատահարների անընդհատ աճող վիճակագրությունն այս տարի վերջին 5 տարվա մեջ առաջին անգամ նվազել է: Այս մասին է վկայում Ոստիկանության տրամադրած պաշտոնական վիճակագրությունը, որի համաձայն` անցած տարվա համեմատ ՃՏՊ-ների թիվը նվազել է 174-ով, զոհերի թիվը՝ 53-ով, վիրավորներինը՝ 253-ով:
Ճանապարհատրանսպորտային պատահարներից տուժած երեխաների թիվը նախորդ տարվա համեմատ կրճատվել է 27-ով:
