ԵՐԵՎԱՆ, 30 օգոստոսի — Sputnik. Ուկրաինայում խոզերի աֆրիկյան ժանտախտ է գրանցվել, հայտնում է Սննդամթերքի անվտանգության և սպառողների պաշտպանության հարցերով զբաղվող պետական ծառայության մամուլի ծառայությունը։
«Խոզերի հիվանդության և անկման դեպքեր են գրանցվել։ Պետական գիտահետազոտական ինստիտուտում վերցված նմուշների լաբորատոր ախտորոշման և անասնաբուժասանիտարական փորձաքննության ուսումնասիրության ժամանակ (Կիև քաղաքում) հայտնաբերվել է խոզերի աֆրիկյան ժանտախտ», — գրված է հաղորդագրության մեջ։
Հիվանդության օջախներում նախատեսվում է տեղայնացման և ժանտախտի տարածման կանխարգելմանն ուղղված միջոցառումների անցկացում, որոշվել են անասնահամաճարակային օջախների սահմանները, պաշտպանության և վերահսկման գոտիները։
Ի դեպ, ինչպես պարզել է Sputnik Արմենիան, խոզերի անկման դեպքեր են գրանցվել նաև Հայաստանում։ Կենդանիների անկման պատճառը դեռ մինչև վերջ չի պարզվել, սակայն խոզերի կերերի մեջ հայտնաբերվել են վնասակար բակտերիաներ։ Կերը ստացվել է հարևան Վրաստանից, սակայն չի բացառվում, որ Վրաստան այն բերվել է մեկ այլ երկրից։
Խոզերի աֆրիկյան ժանտախտը խոզերի վարակիչ վիրուսային հիվանդություն է։ Առաջին անգամ այն գրանցվել է 1903 թվականին Հարավային Աֆրիկայում, Կենդանիների վարակիչ հիվանդությունների միջազգային դասակարգման համաձայն` այն պատկանում է առավել վտանգավոր հիվանդությունների շարքին։ Խոզերի աֆրիկյան ժանտախտը մարդկանց համար վտանգ չի ներկայացնում։ ԽԱԺ-ը բուժման ենթակա չէ և պատվաստանյութով այն կանխարգելել հնարավոր չէ։ Կանգնեցնել հիվանդության տարածումը հնարավոր է միայն խիստ կարանտինի միջոցով։
