ԵՐԵՎԱՆ, 30 օգոստոսի — Sputnik. Արգենտինացի երաժիշտ Գոնսալո Այուսոյի և երաժշտական պրոդյուսեր Լիրա Քոչարյանի ծանոթությունը բեկումնային է եղել երաժշտի համար։ Համագործակցության արդյունքում ծնված երգն արդեն հազարավոր դիտումներ ունի YouTube- ում։
Գոնսալո Այուսոն իր գործունեությունը սկսել է մի քանի շնորհալի երիտասարդների հետ հայրենի Արգենտինայում` համատեղելով երաժշտի ու դերասանի մասնագիտությունները, հասցրել է խաղալ արգենտինական սերիալներում: Առաջին քայլերն արել է այնպիսի ներկայացումներում, որտեղ կենդանի երաժշտություն էր հնչում: Բայց դա չի բավարարել սկսնակ երաժշտին, և նա իր բախտը փորձել է հայրենի տնից հազարավոր կիլոմետրեր հեռու՝ Բարսելոնայում:
Մեկնել է Բարսելոնա՝ գրպանում ունենալով ընդամենը 50 եվրո։ Այնտեղ նա իր արվեստն է ներկայացրել Միջերկրական ծովի ափին գտնվող բարերում և ռեստորաններում։
Համերգներից մեկի ժամանակ ծանոթացել է երաժշտական պրոդյուսեր Լիրա Քոչարյանի հետ, որին այնքան է հրապուրել Գոնսալոյի երաժշտական ոճը, որ միանգամից առաջարկել է միանալ «Արցախի ձայներ» նախագծին, երգ գրել և տեսահոլովակ նկարահանել: Համագործակցության արդյունքում ծնվել է «Nunca» («Երբեք») երգը:
Գոնսալոն չէր էլ կարող պատկերացնել, որ ձայնագրությունից ընդամենը մի քանի օր անց լավագույն ռադիոալիքները կհեռարձակեն իր երգը, իսկ տեսահոլովակը հազարավոր դիտումներ կունենա YouTube- ում: Հայ հասարակությունն իսկույն սիրեց արգենտինացի երաժշտին: Իր երկրում ճանաչման չհասած երաժիշտը մեծ հաջողություն ունեցավ կովկասյան այս երկրում:
