ԵՐԵՎԱՆ, 29 օգոտոսի — Sputnik. Օգոստոսի 30-31-ին կլինի բարձր ջերմաստիճան` մինչև 38 աստիճան տաքություն և առանց տեղումների եղանակ, իսկ սեպտեմբերի առաջին օրերին` 1-3-ին, մայրաքաղաքում և մարզերում օրվա երկրորդ կեսին սպասվում են տեղումներ ` անձրև, ամպրոպ, հնարավոր է քամու ուժգնացում, օդի ջերմաստիճանն էլ կնվազի 5, առանձին վայրերում` 6 աստիճանով, հայտնեց Զարուհի Պետրոսյանը։
«Եթե խոսենք Արարատյան դաշտի մասին, ապա սեպտեմբերին այստեղ աշուն չէ, քանի որ աշուն համարվում է, երբ ջերմաստիճանն իջնում է 15 աստիճանից, այսինքն` միջին օրական ջերմաստիճանը դառնում է 15, 14, 13։ Իսկ սեպտեմբերին այստեղ 20-21 է, ինչը համարվում է ամառային ջերմաստիճան»,- նշեց օդերևութաբանը։
Պետրոսյանը հայտնեց, որ սեպտեմբերի 1-ին Երևանում և Արարատյան դաշտում առավելագույն ջերմաստիճանը չի գերազանցի 33 աստիճանը, իսկ 2-3-ին այն կտատանվի 30-32 աստիճանի սահմաններում։
«Սակայն սա դեռևս ոչինչ չի նշանակում, սրան կհաջորդեն օրեր, երբ կլինի բավականին շոգ, այնպես որ ամառը Հայաստանի հովտային շրջաններում դեռ շարունակվում է»,- ասաց Պետրոսյանը։
Նա հայտնեց, որ սեպտեմբերին միջին ամսական ջերմաստիճանը հանրապետությունում սպասվում է նորմային մոտ, տարբեր գոտիներում նորման տարբեր է, Արարատյան դաշտում այն տատանվում է 20-21 աստիճանի սահմաններում, տեղումների քանակը ևս կլինի նորմային մոտ` 7-10 մմ:
«Ինչ վերաբերում է հյուսիսային շրջաններին, ջերմաստիճանի նորման այստեղ 11-13 աստիճան է։ Հաշվի առնենք, թե սեպտեմբերն ինչպիսի ամիս է. օրեցօր արեգակի բարձրությունը հորիզոնից նվազում է, և բնականաբար օրվա տևողությունը կրճատվում է, տեղի է ունենում ջերմաստիճանի աստիճանական նվազում»,- ասաց նա։
Պետրոսյանի խոսքով` սեպտեմբերի առաջին կեսը նույնիսկ հյուսիսային շրջաններում դեռևս ամառային ռեժիմ է, իսկ դրանից հետո դիտվում է 15 աստիճանից ցածր ջերմաստիճան։ Նրա խոսքով` լեռնային շրջաններում աշունն աստիճանաբար կմտնի իր իրավունքների մեջ։ Ամսական տեղումների քանակը նորմայի մեջ կլինի` 25-35 մմ սահմաններում։
«Սեպտեմբերին ամենաշատ տեղումները կլինեն Լոռվա մարզում` 46 մմ, Տավուշի մարզում` 38-40 մմ, Վայոց Ձորի հովտային շրջաններում` 10-15 մմ, լեռնային շրջաններում` 22-23, Սյունիքի հովտային շրջաններում` 13-40, իսկ լեռնային շրջաններում` մինչև 45 մմ։ Ընդհանուր առմամբ սեպտեմբերը բավական չորային ամիս է»,- հայտնեց օդերևութաբանը։
Պետրոսյանը եզրափակեց, որ այս տարի սեպտեմբերն անակնկալներ չի մատուցի` կլինի նորմային մոտ։
