ԵՐԵՎԱՆ, 29 օգոստոսի — Sputnik, Լաուրա Սարգսյան. Հայաստանի նկարիչների միության սրահում օդը շիկացած էր. այստեղ հավաքվել էին մտավորականներ, բարձրաստիճան պաշտոնյաներ։ Դիտելով ներկայացված լուսանկարները` հյուրերը զուգահեռ փորձում էին գտնել հենց լուսանկարչին, որպեսզի շնորհավորեն նրան։ Ոմանք գրիչ էին տալիս ինքնագրի համար, մյուսները փորձում էին լուսանկարվել Դավթի հետ։
Այդ ընթացքում ներկաներին պատերից նայում էին ԱՄՆ նախագահ Բարաք Օբաման, Ռուսաստանի նախագահ Վլադիմիր Պուտինը, որը գլուխը խոնարհել է սրբապատկերի առջև և ուրիշներ։ Այստեղ կան կադրեր Հռոմի պապ Ֆրանցիսկոսի` Երևան կատարած այցից, ինչպես նաև տարբեր հանդիպումներից և ընդունելություններից։
«Այս ցուցահանդեսով մենք ցանկանում էինք կոտրել կարծրատիպը պաշտոնական լուսանկարների մասին», — Sputnik Արմենիայի թղթակցի հետ զրույցում ասաց Հակոբյանը։ Իսկապես, հավաքածուն ներկայացնում էր համաշխարհային առաջնորդներին, այդ թվում` Հայաստանի նախագահին ոչ սովորական լույսի ներքո։
«Ապրի Դավիթը, ես չէի համարձակվի նրա տարիքում կազմակերպել անհատական լուսանկարչական ցուցահանդես, թեև ցանկանում էի։ Յուրաքանչյուրը կարող է լուսանկարել, սակայն ոչ բոլորին է տրված անհրաժեշտ կադրը տեսնելու կարողությունը»,- ասաց Հայաստանի վաստակավոր լուսանկարիչ և լրագրող Մարտին Շահբազյանը։
Հակոբյանի ցուցահանդեսում ներառված է 40 աշխատանք, որոնք ստեղծվել են 2004թ-ից։ Հեղինակն արդեն մտածում է հաջորդ ցուցադրության մասին, սակայն խոստովանում է, որ դրա համար շատ ժամանակ է պետք։
Հակոբյանն ավարտել է Երևանի Խաչատուր Աբովյանի անվան պետական մանկավարժական համալսարանի մշակույթի ֆակուլտետի գեղարվեստական լուսանկարչության բաժինը։ Աշխատել է տարբեր տեղեկատվական գործակալություններում` որպես ֆոտոլրագրող։ Վերջին վեց տարիներն աշխատում է որպես Հայաստանի նախագահի լուսանկարիչ։
