Բնապահպանության նախարարությունը կարգ է սահմանել, թե որսորդը քանի՞ անգամ կարող է որսի գնալ, որ թռչնից՝ որքան որսալ։ Sputnik Արմենիան Որսի շրջանի և որսորդի իրավունքների մասին զրուցել է «Օրինավոր որսի ակումբ» հասարակական նախաձեռնության անդամ Էդուարդ Սարիբեկյանի հետ։
Նա նշել է, որ որսը լինում է պրոֆեսիոնալ (երբ որսորդը վաճառում է որսածը) և սիրողական (երբ որսի են գնում միայն հաճույքի համար, այլ ոչ թե՝ բիզնեսի)։
Հայաստանում տարածված է սիրողական որսը, որսածը վաճառելը քրեորեն պատժելի է, նշել է Էդուարդ Սարիբեկյանը։
Նա անդրադարձել է նաեւ բնապահպանության նախարարության որոշմանը՝ որսի քանակի վերաբերյալ, տարակուսելով, թե ինչ չափանիշներով է առաջնորդվում նախարարությունը որսի քանակ որոշելով, և արդյո՞ք նախարարության աշխատակիցները իրականացնում են մոնիտորինգ, ինչպես հավատացնում են փաստաթղթերում։
