ԵՐԵՎԱՆ, 29 օգոստոսի — Sputnik. Հայաստանում ռուսական ռազմակայանի զինծառայողների ամառային շրջանի փորձնական պարապմունքները մեկնարկել են։ Այս մասին հայտնում է ՌԻԱ Նովոստին` հղում անելով ՀՌՕ մամուլի ծառայությանը։
«ՀՀ-ում տեղակայված ՀՌՕ ռուսական ռազմակայանում մեկնարկել են 2016 թվականի ամառային ուսումնական շրջանի փորձնական վարժանքները։ Պարապմունքներն անցկացվելու են մոտոհրաձգային և հատուկ ստորաբաժանումներում Գյումրու և Երևանի ռազմական կայազորների միավորումների հրամանատարների գլխավորությամբ», — գրված է հաղորդագրության մեջ։
Նշվում է, որ զորավարժություններին կմասնակցի ավելի քան երկու հազար զինվորական, ներգրավված կլինի ավելի քան 300 միավոր ռազմական և հատուկ նշանակության տեխնիկա, ՄիԳ-29 ինքնաթիռներ և Մի-8ՄՏ և Մի-24Պ ուղղաթիռներ։
Միջոցառումներն անցկացվելու են «Կամխուդ» և «Ալագյազ» բարձրլեռնային զորավարժարաններում։ Մամուլի հաղորդագրության համաձայն` պարապմունքների ժամանակ զինվորականները կկատարեն ուսումնական վարժանքներ հրազենից և ռազմական ու հատուկ նշանակության տեխնիկայից, մարտական տեխնիկա կվարեն բարդ կլիմայական և լեռնային պայմաններում, տարբեր վարժությունների նորմատիվներ կհանձնեն։
