ԵՐԵՎԱՆ, 28 օգոստոսի — Sputnik. Ինտերպոլը հրաժարվել է մեկնաբանել Ռուսաստանի Դաշնության քաղաքացի Սերգեյի Միրոնովին Երևանում ձերբակալելու մասին տեղեկությունը: Այս մասին հայտնում է ՌԻԱ Նովոստին:
«Ինտերպոլը հետաքննություններ չի անցկացնում և մարդկանց չի ձերբակալում. դրանով զբաղվում է ազգային ոստիկանությունը մեր կազմակերպության 190 անդամ երկրներում: Այս կապակցությամբ մենք խորհուրդ ենք տալիս դիմել Հայաստանի և/կամ ԱՄՆ-ի իշխանություններին», — նշել են կազմակերպության՝ Լիոնում գտնվող կենտրոնակայանում:
30-ամյա Միրոնովը ձերբակալվել է Երևանի օդանավակայանում օգոստոսի 26-ին: ԱՄՆ-ն նրա նկատմամբ միջազգային հետախուզում էր հայտարարել` զենք վաճառելու կասկածանքով: Ներկա պահին Միրոնովը ձերբակալված է և գտնվում է մեկուսարանում: Նրան ԱՄՆ-ին հանձնելու հարցը դատարանը հավանաբար կորոշի երկուշաբթի:
