ԵՐԵՎԱՆ, 28 օգոստոսի — Sputnik. Ֆրանցիսկոս պապը հույս է հայտնել, որ առաջին իսկ հնարավորության դեպքում կայցելի կենտրոնական Իտալիայի աղետի գոտի, հայտնում է ՌԻԱ Նովոստին:
«Հնարավորության դեպքում ես կժամանեմ ձեզ մոտ, որպեսզի հավատքի իմ սփոփանքը հասցնեմ անձամբ և քրիստոնեական հույսի աջակցությունս ցուցաբերեմ», — ասել է Պապը` Վատիկանի Սուրբ Պետրոսի հրապարակում կիրակնօրյա քարոզի ժամանակ դիմելով աղետից տուժածներին:
«Եվս մեկ անգամ ասում եմ սիրելի բնակիչներին, որ եկեղեցին կիսում է ձեր տառապանքներն ու մտահոգությունը, աղոթում զոհվածների և փրկվածների համար», — ընդգծել է Հռոմի պապը:
Ֆրանցիսկոս պապը խոսել է նաև այն ջանքերի մասին, որոնք ներդնում են իշխանությունն ու իրավապահ մարմինները, քաղաքացիական պաշտպանության ծառայությունն ու աղետի գոտում աշխատող կամավորները` նշելով այս ողբերգական իրավիճակում մարդկային համախմբվածության կարևոր նշանակությունը:
6.0 մագնիտուդով ուժեղ երկրաշարժը տեղի էր ունեցել չորեքշաբթի գիշերը Իտալիայի կենտրոնական մասում: Ավերածություններ են եղել Լացիո, Մարկե և Ումբրիա շրջաններում: Իտալիայի քաղաքացիական պաշտպանության ծառայության հրապարակած վերջին տվյալների համաձայն՝ երկրաշարժի հետևանքով զոհվել է 290 մարդ: Շուրջ 2.5 հազար մարդ անօթևան է մնացել: Անցյալ հինգշաբթի Իտալիայի նախարարների խորհուրդը երկրաշարժից տուժած շրջաններում արտակարգ ռեժիմ է հայտարարել:
