ԵՐԵՎԱՆ, 27 օգոստոսի — Sputnik. Ռուսաստանցի Օլեգ Միրոնովին Հայաստանում ձերբակալելու համար պաշտոնական մեղադրանքներ և հիմքեր չեն ներկայացվել, Sputnik Արմենիային ասաց նրա փաստաբան Կարեն Ներսիսյանը:
Ավելի վաղ տեղեկություն էր ստացվել, որ ՌԴ քաղաքացի Օլեգ Միրոնովին ձերբակալել են Երևանում՝ փողերի լվացման և տեխնոլոգիաների անօրինական փոխանցման մեղադրանքով: Փաստաբանի խոսքով՝ եթե սովորաբար միջազգային հետախուզությունը կապված է Ինտերպոլի հետ, ապա այս դեպքում Միրոնովն այս գծով չի հետախուզվում:
«Ձերբակալության նախաձեռնողն ԱՄՆ-ն է: Դա այդպիսի ամերիկյան «նոու-հաու» է, ԱՄՆ-ն տեղեկացնում է այլ երկրներին, որ տվյալ քաղաքացիները հետախուզվում են: Ամերիկացիները գործում են իրենց օրենքներով, այլ ոչ թե միջազգային: Եթե Ամերիկայում կա պայմանագիր քրեական գործերով անձնանց հանձնելու մասին, որքան գիտեմ՝ նման պայմանագիր կա, ապա երկիրը պետք է կատարի իր պարտականությունները», — ասաց Ներսիսյանը:
Այն նաև ենթադրում է իրավական և իրավաբանական օգնություն ցուցաբերել, ինչպես նաև օգնել քաղաքացիներին այլ երկրներին հանձնելու հարցում:
Նրա խոսքով՝ առայժմ չկան պաշտոնական փաստաթղթեր՝ հասկանալու համար, թե ինչ մեղադրանք է առաջադրվելու և ինչով է այն հիմնավորված: «Իմ պաշտպանյալը ոչինչ չգիտի, նրան ուղղակի ասել են, որ ԱՄՆ-ի իշխանությունները հետախուզում են նշված կասկածանքներով: Մեզ առայժմ չեն հաղորդել, թե որքանով է դա ճիշտ և ինչով է դա հիմնավորված: Հուսով ենք՝ այդ ամենը կիմանանք դատարանում»,- ասաց Ներսիսյանը:
Նա նշեց, որ երկուշաբթի լրանում է Միրոնովի՝ կալանքի տակ գտնվելու ժամկետը, և Երևանում դատարանը պետք է որոշի, թե ինչ է պետք անել հետագայում. Կա՛մ հանձնել ԱՄՆ-ին, կա՛մ երկարացնել կալանքի ժամկետը հետագա քննության համար: Ներսիսյանը հաղորդեց, որ կիրակի կժամանի Երևան, որպեսզի մասնակցի դատական նիստին:
