ԵՐԵՎԱՆ, 27 օգոստոսի — Sputnik. Թբիլիսիի Հայ գրողների և հասարակական գործիչների Խոջիվանքի պանթեոնում Վրաստանում ՀՀ դեսպանության դիվանագետները, Ջավախքի աջակցության հիմնադրամի ղեկավարները, Վիրահայոց թեմի հոգևոր դասը, համայնքային կառույցների ներկայացուցիչները, թբիլիսահայ մտավորականները ծաղիկ են խոնարհել աշուղ Ջիվանու (Սերոբ Ստեփանի Լևոնյան) շիրիմին:
Ինչպես տեղեկացնում է Հայ Առաքելական եկեղեցու Վիրահայոց թեմը, ծաղիկների խոնարհումով և հոգեհանգստյան արարողությամբ էլ մեկնարկել է Մեծ գուսանի ծննդյան 170-ամյակի տոնակատարությունը:
Բացելով հիշատակի միջոցառումը, Վիրահայոց թեմի մշակույթի բաժնի տնօրեն, «Հայարտուն» կենտրոնի ղեկավար Լևոն Չիդիլյանը ներկաներին հրավիրել է մասնակցելու օգոստոսի 27-ին աշուղ Ջիվանու ծննդավայր Կարծախ գյուղում կայանալիք Ջիվանու ավանդական երգարվեստի մեծարման միջոցառմանը, որը կնշանավորվի աշուղական արվեստի մրցույթով և գուսանի տուն-թանգարանի հանդիսավոր բացմամբ:
Աշուղ Ջիվանու խոհափիլիսոփայական և ժողովրդական ստեղծագործության մեծարման և խոնարհումի խոսք են ասել բանաստեղծ, թարգմանիչ Անահիտ Բոստանջյանը, ՋԱՀ-ի նախագահ Սոս Սահակյանը, գործադիր տնօրեն Աշոտ Հակոբյանը, Թբիլիսիի Պետրոս Ադամյանի անվան հայպետդրամայի թատրոնի գեղարվեստական ղեկավար Արմեն Բայանդուրյանը, «Վրաստան» թերթի խմբագիր Վան Բայբուրթյանը:
Մեծ գուսանի ծոռնուհի, Արաքսյա դստեր թոռը՝ Գրետա Նիժարաձեն, երախտագիտության խոսքեր է ուղղել Ջավախքի աջակցության հիմնադրամին և Ախալքալաքի մունիցիպալիտետին, ում նախաձեռնությամբ և աջակցությամբ բացվում է իր մեծ պապի տուն-թանգարանը նրա ծննդավայրում:
Ներկաների կողմից Կարծախ գյուղից բերված հող ու ջրով ցողվել է Ջիվանու տապանաքարը:
Միջոցառման ավարտին հավաքվածներին օրհնության խոսք է հղել Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը: Սրբազան հայրը մեծարման խոսքեր է ուղղել Ջավախքին և Ջավախքի արվեստասեր հայությանը, որը դարձել է հայապահպանության օրինակ, նաև հայ-վրացական բարեկամության անքակտելի օղակ:
Վիրահայոց թեմի առաջնորդի և հոգևոր դասի մասնակցությամբ կատարվել է հոգեհանգստյան արարողություն, որն ուղեկցվել է Թբիլիսիի Սուրբ Էջմիածին եկեղեցու երգչախմբի կատարումներով:
