ԵՐԵՎԱՆ, 27 օգոստոսի — Sputnik. «Կիրգիզ բիրիմդիգի» միջազգային հասարակական կազմակերպության ղեկավար Աբդիգանի Շակիրովը հայտնել է, որ Մոսկվայի հյուսիսում գտնվող շենքում բռնկած հրդեհի հետևանքով մահացած 17 անձանց մեծամասնությունը աղջիկներ են:
«Ականատեսների խոսքով՝ մահացածները հիմնականում աղջիկներ են, բոլորն աշխատել են այստեղ»,- ասել է Շակիրովը: Ղրղըզական սփյուռքի ներկայացուցիչը խոստացել է աջակցել տուժած հայրենակիցներին և նշել, որ «աշխատանքի բնույթից ելնելով՝ տպարանում հիմնականում աղջիկներ են աշխատել»:
Ըստ նրա՝ տուժածների շարքում կան Ղրղըզստանի քաղաքացիներ՝ երկրի տարբեր շրջաններից:
Շակիրովը հիշել է Մոսկվայում տեղի ունեցած ևս մի դեպք, երբ անցած ձմռանը հրդեհ էր բռնկել Ստրոմինկայի փողոցում տեղակայված կարի արտադրամասում,: Այդ ժամանակ մահացել էր Ղրղըզստանի 12 քաղաքացի: Նրա խոսքով՝ այսօրվա հրդեհը տեղի է ունեցել հերթափոխի ժամանակ: Աղջիկները եղել են հանդերձարանում, որի մուտքը փակել է ստորին հարկից բարձրացած ծուխը: Ղրղըզստանի ԱԳՆ-ի տեղեկատվության համաձայն՝ 17 մահացածներից 14 երկրի քաղաքացիներ են:
Օգոստոսի 27-ի առավոտյան հրդեհ է բռնկել Մոսկվայի հյուսիսում գտնվող պահեստներից մեկում: Արտակարգ ծառայությունների աղբյուրի տվյալներով՝ պահեստը պատկանում է «Պեչատնի էքսպրես» տպարանին: Մահացել է 17 մարդ, տուժել՝ 3-ը: Հարուցվել է քրեական գործ հրդեհային անվտանգությունը խախտելու մասին:
