ԵՐԵՎԱՆ, 26 օգոստոսի — Sputnik. Հայտնի հիթի, ինչպես նաև АVO ծխախոտային ապրանքնաիշի հեղինակ Ավո Ուվեզյանը պատրաստվում է Հայաստան այցելել։ Այս մասին Facebook սոցցանցի իր էջում գրել է Արման Հովհաննիսյանը։
«Վերջերս ԱՄՆ-ում պատիվ ունեցա ներկա գտնվելու մեր Մեծ հայրենակից Ավո Ուվեզյանին, ծննդյան 90-ամյակի կապակցությամբ, Հայաստանի վարչապետի հուշամեդալով պարգևատրմանը: Ավո Ուվեզյանը հռչակավոր և բացառիկ այն հայերից է, որի անունը հավասարապես կապվում է թե հաջողակ գործարարության, թե երաժշտության հետ և երկու ոլորտներում էլ նա հասել է մեծ բարձունքների։ Ավո Ուվեզյանը 20-րդ դարի երգարվեստի ամենահայտնի ստեղծագործություններից մեկի` «Strangers in the night» երգի հեղինակն է, որը կատարում էր աշխարհահռչակ Ֆրենկ Սինատրան: Նա բեմ է դուրս եկել և նվագել է Ռեյ Չարլզի, Ջեյմս Բրաունի հետ: Ավո Ուվեզյանը աշխարհում առաջատար դիրքեր զբաղեցնող AVO ֆիրմայի սիգարների ստեղծողն է»,- գրել է Հովհաննիսյանը։
AVO ծխախոտները պատահաբար են ստեղծվել։ 1980-ականներին ջազ երաժիշտ Ուվեզյանը մի քանի տարվա դեգերումներից հետո մեկնել է Պուերտո Ռիկո։ Այստեղ նա ամուսնացել է, ռեստորան բացել և ջազ խումբ ստեղծել, որի հետ նվագում էր կուրորտային ռեստորաններում։ Մի օր նվագելիս նա հանդիպում է շվեցարահայ Ժակ Մելքոնյանի հետ, որը միտք է հայտնում զբաղվել սիգարների արտադրությամբ։
Սկզբնական ժամանակները Ավոն սիգարներ էր պատրաստում իր և ընկերների համար։ Այնուհետև 1988 թ-ին նա 10 տուփ սիգար է ուղարկում աշխարհահռչակ Davidoff ընկերություն։ Սիգարները շատ արագ վաճառվում են, և ընկերությունը նոր պատվեր է անում։
Դրանից հետո Ավո Ուվեզյանը և Davidoff-ը անբաժան են։ 1996 թ-ին Davidoff ընկերությունը 10 միլիոն դոլարով գնում է AVO սիգարային բրենդի իրավունքները։ AVO տարբերանշանի հեղինակն է հայտնի անգլիացի դիզայներ Դառել Այրլենդը։
2000 թ-ին Ավո Ուվեզյանը ստեղծում է Ավո Մադուրո (Avo Maduro) սիգարները, որոնք առանձնանում են իրենց քաղցր համով։
