ԵՐԵՎԱՆ, 26 օգոստոսի — Sputnik. Նորաստեղծ «Ուրարտու» բասկետբոլային ակումբը պայմանագիր է կնքել ամերիկացի բասկետբոլիստ Տերի Սմիթի հետ։ Այս մասին նշված է ակումբի ֆեյսբուքյան էջում։ Տերի Սմիթը կմասնակցի 2016/17 խաղաշրջանի Ռուսաստանի առաջնությունում։
Ավելի վաղ Տերի Սմիթը խաղացել է ֆրանսիական «Ասվել» և թուրքական «Սակրյա» ակումբներում։
Ավելի վաղ թիմի գլխավոր տնօրեն Արա Պողոսյանը հայտնել էր, որ «Ուրարտու» ակումբը հայտ է ներկայացրել ռուսական սուպերլիգայի հաջորդ սեզոնի խաղարկությանը մասնակցելու համար (1 դիվիզիոն)։
«Թիմը հիմնականում համալրված է լինելու Հայաստանի հավաքականի խաղացողներով։ Հայաստանը հաղթել էր փոքր երկրների Եվրոպայի 2016 թվականի առաջնությունում։ Բայց մրցունակ լինելու համար, մենք մեկ-երկու լեգիոների համար հայտ կուղարկենք», — ասել էր գլխավոր տնօրենը։
«Ուրարտու» անվանումով բասկետբոլային թիմ կար նաև խորհրդային տարիներին։ Այդ տարիներին «Ուրարտու» ակումբում է հանդես եկել նաև բասկետբոլի Հայաստանի հավաքականի ներկայիս մարզիչ Տիգրան Գյոկչյանը:
