ԵՐԵՎԱՆ, 26 օգոստոսի — Sputnik. Արթուր Սարգսյանի պաշտպան Դավիթ Գյուրջյանի խոսքով` պաշտպանական կողմը հայտարարել էր, որ «հաց բերող» Արթուր Սարգսյանին կալանքի տակ պահելու հիմքերը վերացվել են և միջնորդել էր նրան ազատ արձակել գրավի դիմաց, քանի որ Արթուրը նաև առողջական խնդիրներ ունի, որոնք անհամատեղելի են բանտային պայմանների հետ:
«Միջնորդությունը մերժելու վերաբերյալ դատարանը հիմնավորումներ, պարզաբանումներ չի ներկայացրել, Արթուր Սարգսյանը չէր ներկայացվել դատարան»,- ասաց Արթուր Սարգսյանի պաշտպան Դավիթ Գյուրջյանը։
Փաստաբանի խոսքով` իրենք պատրաստվում են դիմել Վճռաբեկ դատարան:
«Ներպետական ատյանները սպառելուց հետո, հնարավոր է, դիմենք Մարդու իրավունքների Եվրոպական դատարան»,- ասաց նա:
Նշենք, որ «Սասնա ծռերին» սնունդ հասցրած Արթուր Սարգսյանին սկզբում առաջադրված մեղադրանքը հետագայում փոխվեց:
Նախկինում Արթուր Սարգսյանը մեղադրվում էր ՀՀ քրեական օրենսգրքի 218 հոդվածի 3-րդ մասի 1-ին կետով, այն է՝ պատանդ վերցնելը, և 235 հոդվածի 3-րդ մասով (ապօրինի զենք-զինամթերք ձեռք բերելը, իրացնելը, պահելը):
Այժմ Արթուր Սարգսյանը մեղադրվում է այդ հոդվածներով կատարված արարքներին օժանդակելու մեջ:
