ԵՐԵՎԱՆ, 26 օգոստոսի — Sputnik. Արմենուհի Մխոյան. Նիկան 11 տարեկան է՝ Իրանից։ Նա նման է հրեշտակի` բարություն ու խաղաղություն ճառագայթող խորիմաստ աչքեր, թավշա աստվածային ձայն։ Երկու հյուսքով, անչափ բարի սևաչյա աղջնակը փխրուն տեսք ունի, սակայն համամարդկային բեռն է իր ուսերին է կրում՝ խաղաղության կոչ հնչեցնելով աշխարհի տարբեր երկրներում:
Նիկան տարբեր երկրներում մենահամերգներ է ունենում «Երաժշտությունը հանուն խաղաղության» հիմնադրամի նախաձեռնությամբ, որի հիմնադրիրը մայրն է՝ Նազլի Բախշայեշը: Մայրը նաև բեմում աղջկա կողքին է՝ նվագակցելով փոքրիկ երգչուհուն:
Նիկան իր համերգներով դատապարտում է մարդածին բոլոր աղետները՝ պատերազմներն ու ցեղասպանությունը, չի մոռանում նաև ներկայացնել 20-րդ դարի մեծագույն ողբերգությունը` Հայոց ցեղասպանությունը: Նիկան ասաց, որ մայրիկն է իրեն պատմել Հայոց ցեղասպանության մասին, որից հետո ինքն իր ծրագրում ընդգրկել է նաև «Գարուն» ու «Կռունկ» երգերը: Սա այն եզակի դեպքերից է, երբ հայկական արմատներ չունենալով` արվեստագետը խոսում ու դատապարտում է Հայոց ցեղասպանությունը: Նիկան երգում է տարբեր լեզուներով՝ պարսկերեն, ռուսերեն, ճապոներեն, հայերեն և այլն:
Օգոստոսի 25-ին Նիկան Գյումրիում էր՝ ներկայացրեց 6 երգ, իսկ որպես եզրափակում` հնչեցրեց «Կռունկը»: Յուրահատուկ թավշյա ձայն ու մեծահասակին հատուկ կատարողական վարպետություն, իսկ ամենակարևորը՝ համամարդկային կոչ, և հանդիսատեսն անկարող է հիացմունքն ու արցունքները զսպել:
Հետաքրքրվեցի՝ դժվար չէ՞ «Կռունկը» կատարել:
«Ոչ,-նշեց աղջնակը` հավելելով,- «Կռունկը» ոչ միայն Հայաստանում եմ երգելու, այլև այն բոլոր երկրներում, ուր գնալու եմ՝ որպես ցեղասպանությունը դատապարտող կոչ»:
Բոլոր երկրներում Նիկան պատրաստում է թղթե կռունկներ և համերգից հետո` որպես խաղաղության խորհրդանիշ, բաժանում է հանդիսատեսին:
Նիկան առաջին անգամ չէ Հայաստանում. արդեն հասցրել է Գյումրիում մասնակցել երաժիշտ-կատարողների «Վերածնունդ» փառատոնին՝ գրավելով առաջին հորիզոնականը: Նիկայի համար մենահամերգներով շրջագայության ողջ տարվա ծրագիրն արդեն կա՝ դրա մասին ավելի շատ խոսում է մայրը:
«Մոտ 5 տարի աշխատում ենք քարոզել խաղաղություն և դատապարտել պատերազմներն ու ցեղասպանությունը: «Երաժշտություն հանուն խաղաղության» հիմնադրամի միջոցով նախագծեր ենք իրականացրել Ճապոնիայում ու Իրանում: Արդեն 4-րդ անգամ եմ գալիս Հայաստան և ամեն անգամ նորանոր բաներ եմ իմանում ցեղասպանության մասին: Ահա այդ պատճառով իմ դուստրը երկու երգ է երգում ցեղասպանության թեմայով»,- նշեց Նազլի Բախշայեշը՝ փաստելով, որ Գյումրին շատ է հավանում՝ քանի որ մշակութային քաղաք է, ուր յուրաքանչյուր քար մշակույթ է շնչում:
Կատարողական բարձր արվեստի և հայ-իրանական մշակութային կապերի ամրապնդման համար Նիկան պարգևատրվեց Գյումրու քաղաքապետ Սամվել Բալասանյանի պատվոգրով և Գյումրու Երիտասարդական պալատի շնորհակալագրով ու հուշանվերով՝ իր գծանկարը, որն ամենաշատն ուրախացրեց փոքրիկ երգչուհուն, և նա չթաքցրեց անկեղծ զարմանքն ու հիացմունքը:
Համերգի ավարտին՝ ի նշան խաղաղության և համերաշխության, Նիկան իր պատրաստած թղթե կռունկները նվիրեց հանդիսատեսին:
