ԵՐԵՎԱՆ, 25 օգոստոսի — Sputnik. Մոսկվայի Բոլշոյ Նիկիտսկի փողոցի վրա գտնվող «Սիթիբանկի» բաժանմունքի վրա հարձակում իրականացրած և մի քանի մարդու պատանդ վերցրած սնանկ գործարարը հարցաքննության ժամանակ հայտնել է, որ չէր պատրաստվում որևէ մեկին սպանել, հայտնում է ՌԻԱ Նովոստին` հղում անելով Ռուսաստանի քննչական կոմիտեի գլխավոր քննչական վարչության ղեկավարի ավագ օգնական Յուլիա Իվանովային։
Նրա խոսքով` տղամարդը պարզապես ցանկացել է ուշադրություն հրավիրել իր վրա։ «Տղամարդը հարցաքննության ժամանակ հայտնել է, որ մտադիր չէր սպանել պատանդ վերցրած անձանց։ Նա ասել է, որ պարզապես ցանկանում էր ուշադրություն հրավիրել իր խնդրի վրա», — ասել է Իվանովան։
Սնանկացած գործարար Արամ Պետրոսյանը չորեքշաբթի գիշերը գրավել է Մոսկվայի կենտրոնում գտնվող «Սիթիբանկի» մասնաճյուղը և պատանդ վերցրել ներսում գտնվողներին։ Ինչպես պարզվել է ավելի ուշ, տղամարդու ձեռքում կեղծ պայթուցիկ սարք է եղել:
Ըստ որոշ տվյալների, նա զբաղվել է բժշկական ապրանքի արտադրությամբ և սնանկացել։ Սկզբում հաղորդվում էր, որ նա չորս հոգու է պատանդ վերցրել, սակայն հետագայում պարզվել է, որ նրանք վեցն են եղել։ Բոլոր պատանդներն աստիճանաբար ազատ են արձակվել, որից հետո Պետրոսյանը հանձնվել է ոստիկանությանը։ Պայթուցիկ սարքը իրականում աղի տուփ է եղել: Գրավման ժամանակ տղամարդը պահանջել է, որ իր կոչը ցուցադրեն հեռուստատեսությամբ: Նա փորձել է այդ կերպ ուշադրություն հրավիրել իր խնդրի և բոլոր սնանկացած ձեռնարկատերերի վրա։
