ԵՐԵՎԱՆ, 24 օգոստոսի — Sputnik. Օրենսդրության մեջ փոփոխություններ կատարելուց հետո ՃՏՊ-ն կարձանագրեն ոչ թե ապահովագրողները, այլ` Ճանապարհային ոստիկանությունը, որն էլ կորոշի, թե ով է մեղավոր կողմը, չորեքշաբթի լրագրողներին հայտնեց Ավտոապահովագրության բյուրոյի նախագահ Վահան Ավետիսյանը։
«Որոշակի ուսումնասիրություններից հետո մենք եկանք այն եզրակացության, որ կարելի է վնասի շեմը (վարորդների կողմից պատահարների ինքնուրույն գրանցման) 50000 բարձրացնել մինչև 100000 դրամ», — ասաց Ավետիսյանը։
Այսպիսով, սեպտեմբերի 1-ից, եթե տրանսպորտային միջոցի հասցված վնասը, ըստ տուժածի, չի գերազանցի 100 հազար դրամը, վարորդները կկարողանան այն գրանցել ինքնուրույն։
Հուլիսին գրանցվել է համաձայնեցված հայտարարագրի լրացման շուրջ 430 դեպք, որի արդյունքում վճարվել է 17 մլն դրամ։ Սպասվում է, որ շեմի բարձրացումից հետո սեպտեմբերի 1-ից յուրաքանչյուր ամիս կլրացվի շուրջ 1200-1500 հայտարարագիր։
Եթե վնասի չափը գերազանցի 100 հազար դրամը, խախտումը կգրանցի Ճանապարհային ոստիկանությունը։
Վարորդները ՃՏՊ-ի դեպքում պետք է դիմեն Ճանապարհային ոստիկանությանը, քանի որ ՃՏՊ-ի վայրում ապահովագրողների ներկայությունն այլևս պարտադիր պայման չի լինելու։ ՃՏՊ-ի մասնակիցները պետք է միայն տեղեկացնեն ապահովագրական ընկերությանը դեպքի մասին պատահարից հետո 40 րոպեի ընթացքում։
«Այսպիսով, մենք ունենում ենք ՃՏՊ-ների գրանցման ավելի պարզեցված համակարգ։ Կա՛մ դա անում են հենց վարորդները քիչ վնասի դեպքում, կա՛մ կանչում են Ճանապարհային ոստիկաններին, որոնց ժամանումից առաջ վարորդները չպետք է տեղաշարժեն տրանսպորտային միջոցը», — ասաց Ավետիսյանը։
Նրա խոսքով` Ճանապարհային ոստիկանության արձանագրած ՃՏՊ-ի դեպքերը կփոխանցվեն ապահովագրական ընկերությանը։
Երրորդ փոփոխությունն այն է, որ սեպտեմբերի 1-ից այլևս անհրաժեշտ չէ ԱՊՊԱ պայմանագրում նշել ավտոմեքենան վարող անձանց անունները։ Ավտոմեքենաները կհամարվեն պատշաճ ապահովագրված` ավտոմեքենաների սեփականատերերի կողմից վարորդական իրավունք ունեցող ցանկացած անձի ավտոմեքենան վարման հանձնելու դեպքում` առանց դրա համար հավելյալ ապահովագրավճարներ վճարելու։
Գործող պայմանագրերն ավտոմատ կերպով կհամարվեն վերակնքված բոլոր վարորդների համար։
Ավետիսյանն ավելացրեց, որ ԱՊՊԱ-ի վճարները նվազեցվել են հասարակական տրանսպորտի վարորդների համար։
